Zemaj: Kemi rënie të numrit të të infektuarve, jemi më mirë se vendet me sistem më të avancuar shëndetësor

11/09/2020 15:29

Ministri i Shëndetësisë, Armend Zemaj ka thënë se kemi rënie të trendit të të infektuarve me coronavirus.

Zemaj ka thënë se jemi më mirë se shumë vende të tjera në rajon, madje edhe më mirë se vendet me sistem më të avancuar shëndetësor, e kjo na bën edhe më të përkushtuar e të vendosur që ta ngrisim performancën e shëndetësisë tonë.

“Do të jem unë me tërë ekipin tim në shërbimin tuaj në pajtim me mandatin ligjor, duke ju siguruar dhe do të bëjë gjithçka që ta ulim numrin e të prekurve me COVID-19, të infektuarve t’ju qëndrojmë afër si dhe të gjithë së bashku të kujdesemi për shëndetin e të gjithëve”, ka shkruar Zemaj.

Postimi i plotë:

Të nderuar qytetarë,
Të nderuar kontribues e bashkëpjesëmarrës në luftimin e pandemisë,
Me përkushtimin dhe angazhimin maksimal, ka rënie të trendit të të infektuarve, ku sot nga 561 të testuar, raste pozitive janë 50.
Jemi më mirë se shumë vende të tjera në rajon, madje edhe më mirë se vendet me sistem më të avancuar shëndetësor, e kjo na bën edhe më të përkushtuar e të vendosur që ta ngrisim performancën e shëndetësisë tonë.
Të nderuarë qytetarë,
Sot, kur po i bëjë 100 ditë në krye të Ministrisë së Shëndetësisë̈, dua t’ju falënderoj përzemërsisht për bashkëpunimin që kemi pasur gjatë këtyre ditëve, me të gjitha institucionet për respektimin e masave sa i përket mbrojtjes nga Covid 19.
Kam vizituar shumë qytete dhe fshatra, kam takuar shumë qytetarë, kemi folur e kemi ballafaquar argumente pro dhe kundër pranisë dhe luftimin e virusit Covid-19 në mesin tonë.
Nga të gjitha takimet me juve, në tërë vendin, rrjedh një përfundim i padiskutueshëm se të bashkuar ia dalim.
Qytetarë të vendit tim,
Do të jem unë me tërë ekipin tim në shërbimin tuaj në pajtim me mandatin ligjor, duke ju siguruar dhe do të bëjë gjithçka që ta ulim numrin e të prekurve me Covid 19, të infektuarve t’ju qëndrojmë afër si dhe të gjithë së bashku të kujdesemi për shëndetin e të gjithëve.
Të nderuar qytetarë,
Përzemërsisht ju ftoj që edhe më tej të jeni bashkëpunuesit tonë, sepse vetëm të bashkuar, mund të arrijmë aty ku dëshirojmë, ta largojmë pandeminë!
Bashkë mund t’ia dalim!
Vendose maskën!
Mbaje higjienën!
Ruaje distancën!