Edhe këtë Gusht të nxehtë, pyjet në disa zona të Shqipërisë nuk i shpëtuan zjarreve, të cilat në shumicën e rasteve janë të qëllimshme ose nga pakujdesia.
“Kjo është ajo çfarë ka mbetur nga një zjarr masiv i 24 orëve të fundit këtu në kodrat e Peqinit. Janë 30 hektarë të përpirë nga flakët ku janë djegur edhe 4000 rrënjë me ullinj. Flakët e këtij zjarri kanë mbërritur deri në fund të kodrës ku janë të ndërtuara këto shtëpi.”
Kjo banore e Peqinit tregon për Top Channel situatën e rrezikshme që shkaktuan flakët pranë shtëpisë së saj.
“Me të vërtetë që ishte diçka e tmerrshme ishin flakë të shumta edhe kërcisnin ullinjtë. Frika na hyri në palcë. Zjarri ishte gati për të hyrë në banesë dhe faleminderit që erdhën shpejte zjarrfikësit dhe e shuan. Ishte diçka e tmerrshme tmerr i vërtetë.”
Julian Kosta kreu zjarrfikësve të Peqinit i tha Top Channel se u përballën me furinë e zjarrit të cilin era e përhapi me shpejtësi në kodrën afër spitalit, duke rrezikuar shumë shtëpi.
U desh mbështetja e zjarrfikësve nga Kavaja dhe Tirana për të vënë nën kontroll flakët. Julian Kosota thotë se dyshohet për një zjarrvënie të qëllimshme nga barinjtë e zonës ose ndonjë gjuetar shpendësh. Policia lokale dhe prokuroria e Elbasanit vijojnë hetimit.
Deri më tani nuk ka asnjë të shoqëruar për këtë zjarr.Në qarkun e Elbasanit nuk janë vetëm kodrat e Peqinit që u përfshinë nga zjarret këto 48 orët e fundit.
Korrespondentja e Top Channel në Elbasan Bruna Kërcyku raporton se në zonën e Gurit të Zi të Labinotit-Mal u desh ndërhyrja nga ajri për shuarjen e zjarrit ndërkohë një tjetër vatër zjarri është në pyjet e Gramshit.
Agjencia Kombëtare e Mbrojtjes Civile thotë se zjarret kanë krijuar situata emergjente, duhet bashkërendim dhe koordinim strukturash.
Përmes një shkrese dërguar policisë së shtetit kërkohet, vënia para përgjegjësisë e zjarrvënësve.
Top Channel
