Edhe gripi i shpendëve është kinez/ Rreziku që kanoset, shkencëtarët: Kërkesa për mish mund ta nxjerrë jashtë kontrollit
05/05 13:27
Figura politike dominuese e Sllovakisë, Robert Fico, do të kandidojë për t’u bërë anëtar i Gjykatës Kushtetuese këtë muaj, duke kërkuar të braktisë politikën e partisë, më pak se një vit pasi u largua nga zyra e kryeministrit, përballë zemërimit për vrasjen e një gazetari.
Vrasja e Jan Kuciak, i cili hetoi korrupsionin politik dhe mashtrimin e subvencionimit të BE-së, dhe të fejuarës së tij Martina Kusnirova, shkaktoi protestat më të mëdha kundër politikës në Sllovaki, që nga rënia e komunizmit në 1989.
Fico dha dorëheqjen në mars pasi ishte në pushtet për gati një dekadë, por mbetet kryetar i partisë qeverisëse Smer dhe shihet si politikani drejtues prapa skenave, ndërsa aleati i partisë Peter Pellegrini shërben si kryeministër.
Tani Fico, 54 vjeç, i cili ka diplomë juridike dhe e përfaqësoi Sllovakinë në Gjykatën Evropiane të të Drejtave të Njeriut në vitet 1994-2000, është nominuar për t’u bërë gjykatës i Gjykatës Kushtetuese të vendit.
Kushtetuesja është gjykata më e lartë e vendit, e cila rregullon nëse legjislacioni i miratuar nga parlamenti dhe gjykimet nga gjykatat më të ulëta janë në përputhje me kushtetutën. Ish-ligjvënësit janë zgjedhur më parë për të shërbyer në të, por kurrë ish udhëheqës të partisë ose kryeministra.
Parlamenti, ku koalicioni qeverisës ka një shumicë të ngushtë prej 76 nga 150 vota, do të zgjedhë 18 kandidatë për t’u bërë gjyqtarë të Gjykatës Kushtetuese në një votim më vonë gjatë këtij muaji.
Presidenti Andrej Kiska, i cili nuk është i lidhur me ndonjë parti dhe që u bashkua me protestuesit duke bërë thirrje për rrëzimin e Fico, do të zgjedhë nëntë prej tyre për të zëvendësuar gjyqtarët, mandati i të cilëve përfundon më 16 shkurt.
Top Channel
