Demarkacioni s’ka vota. Shtyhet për herë të tretë seanca e Kuvendit

“Me pajtimin e kryetarëve të grupeve parlamentare, seanca e sotme e Kuvendit të Kosovës shtyhet për një ditë tjetër. Për vazhdimin e saj do të vendosë Kryesia e Kuvendit”, thuhet në njoftim.

Kjo është hera e tretë që seanca e jashtëzakonshme, ku ishte parashikuar të hidhej në votim ratifikimi i marrëveshjes për kufirin me Malin e Zi, dështon. Ndryshimi me dy përpjekjet e mëhershme, të cilat dështuan për shkak të mospajtimeve të mëdha mes forcave politike, është se këtë radhë ishte arritur konsensusi mes partive shqiptare në pushtet dhe LDK-së.

Megjithatë, as kjo nuk u duk e mjaftueshme për arritjen e 80 votave të nevojshme, që ujdia të merrte “dritën jeshile” të Kuvendit. Që të sigurohet numri i nevojshëm duhen të paktën edhe dy vota. Ato po kërkohen brenda grupit parlamentar të Vetëvendosjes ose Listës Serbe, me këtë të fundit pjesë e koalicionit qeverisës, por që deri tani e ka kundërshtuar Demarkacionin.

Vetëvendosja, pavarësisht përçarjeve, ka paralajmëruar një votë kundër, ndërsa “Lista Serbe” thotë se çdo gjë do të varet nga takimet në kuadër të dialogut të Brukselit, ku temë diskutimi të martën ka qenë edhe krijimi i Asociacionit të komunave me shumicë serbe.

Seanca në Kuvend përkonte me ditën kur Prishtinën e viziton treshja e fuqishme e Bashkimit Europian: presidenti i KE-së, Jean-Claude Juncker; shefja e diplomacisë Federica Mogherini; si dhe Komisioneri i Zgjerimit, Johannes Hahn.

Ratifikimi i Demarkacionit me Malin e Zi është kushti që Kosova duhet të përmbushë në mënyrë që qytetarët e saj të mund të udhëtojnë lirshëm në zonën “Schengen”. Vetëvendosja është kundër paktit, sepse mendon që përmes tij vendi po humbet territor. Kryetari i Parlamentit të Kosovës, Kadri Veseli u shpreh një ditë më parë se ishte i bindur që Demarkacioni do të kalonte në Kuvend.

Top Channel