Serbia anëtare e BE brenda 2025? Shqipëria sërish pa afate

Sipas asaj që raporton Radio Evropa e Lirë, në strategjinë e miratuar, e që do të publikohet të martën, vetëm Mali i Zi dhe Serbia marrin afate kohore të qarta për anëtarësimin. Strategjia thotë se si Beogradi, ashtu edhe Podgorica mund të jenë anëtare me të drejta të plota të BE-së brenda vitit 2025.

“Negociatat e anëtarësimit janë duke u zhvilluar me Malin e Zi dhe Serbinë. Me vullnet politik, me reforma reale dhe të qëndrueshme, si dhe me zgjidhje përfundimtare të kontesteve me fqinjët, këto dy vende do të jenë potencialisht të gatshme për anëtarësim në vitin 2025”, thuhet në tekstin e Strategjisë së Komisionit Europian.

Sa i takon Shqipërisë nuk caktohet asnjë afat kohor, por shprehet gatishmëria e Komisionit për të rekomanduar hapjen e negociatave të anëtarësimit në bazë të kushteve të plotësuara.

“Komisioni është i gatshëm të përgatisë rekomandime për hapjen e negociatave të anëtarësimit me Shqipërinë dhe Ish-Republikën Jugosllave të Maqedonisë, në bazë të kushteve të plotësuara. Me përpjekje dhe angazhim të vazhdueshëm, Bosnja dhe Hercegovina mund të bëhet kandidate për anëtarësim. Kosova ka mundësi të bëjë përparim të qëndrueshëm me zbatimin e Marrëveshjes së Stabilizim-Asociimit dhe të avancojë në rrugën e saj evropiane kur të lejojnë rrethanat objektive”, thuhet në dokumentin e siguruar nga REL.

Sipas Radio Evropa e Lirë, në dokument BE ashpërson gjuhën në kapitullin për sundimin e ligjit.

“Sot, vendet tregojnë elemente të qarta të shteteve ‘të kapura’, përfshirë lidhje me krimin e organizuar dhe korrupsionin në të gjitha nivelet e qeverisë dhe administratës, si dhe përzierje të fuqishme të interesave publike dhe private”, thuhet në të.

Strategjia për Ballkanin Perëndimor vë theksin mbi dy çështje të rëndësishme që ndikojnë në të gjithë rajonin dhe që duhet të zgjidhen përpara se ndonjë vend i rajonit t’i bashkohet BE-së: dialogu midis Kosovës dhe Serbisë dhe mosmarrëveshjet dypalëshe.

Top Channel