May i gjen votat. Qeveri pakice me DUP-në

Në fund të numërimit të votave, konservatorët rezulton të kenë siguruar 319 vende në Parlament, nga 326 që nevojiteshin për një shumicë të rehatshme.

Por pavarësisht dështimit spektakolar për të zgjeruar edhe më shumë mazhorancën, mbështetja e partisë më të madhe politike në Irlandën e Veriut e çoi Mayn në “Buckingham Palace” për të kërkuar lejen e krijimit të qeverisë së re, e cila do të ofrojë sipas saj stabilitet dhe do ta mbajë vendin të sigurtë.

Përfundimi kaq i papritur i një fushate, të mbushur me parashikime për fitore historike të konservatorëve, ngriti menjëherë pyetjen nëse kryeministrja duhet ta ruante në vazhdimësi pozicionin e saj në “Downing Street”, gjë të cilën ajo e hodhi poshtë që në fillim.

Londinezët e pyetur nga “Reuters” mendonin se May duhet të largohet, ndërsa pati edhe protesta.

“Nuk e di, po them se tani duhet të japë dorëheqjen, apo jo?”, tha një londinez.

“Më duket se Theresa May bëri një hap të madh prapa. Ajo e luajti lojën, por humbi”, tha një tjetër qytetar britanik.

Rezultati rrezikon të çorientojë planet e largimit nga Bashkimi Europian, duke kërcënuar ta lërë Britaninë pa organizim vetëm disa ditë përpara fillimit të bisedimeve me udhëheqësit europianë mbi kushtet e “Brexit”-it.

Kryeministri francez, Edouard Philippe tha megjithatë se vendimi befasues i popullit britanik nuk e vë në pikëpyetje daljen e vendit nga BE-ja. Ndërsa gjermanët konsiderojnë se goditja ndëshkuese e publikut britanik do t’i bëjë bisedimet e “Brexit”-it edhe më të vështira e më komplekse.

Top Channel