Trump pret Trudeau, SHBA-Kanada, bashkëpunim ekonomik

Trudeau dhe Trump, premtuan se do të punojnë së bashku për të garantuar rritjen ekonomike dhe hapjen e vendeve të reja të punës për të dyja vendet. Në një konferencë për shtyp, ata nënvizuan objektivat e përbashkët ekonomikë të SHBA dhe Kanadasë si edhe bashkëpunimit ndërkombëtar.

“Ne do të koordinohemi për të mbrojtur vendet e punës në hemisferën tonë dhe për të mbajtur pasurinë në kontinentin tonë”.

Lideri kanadez gjithsesi, tha se ata kishin patur një diskutim të frytshëm për emigracionin, por nënvizoi se vendi i tij kish ndjekur një politikë hapjeje kundrejt refugjatëve, pa kompromentuar sigurinë. E për të nxjerrë në pah edhe më tepër kortezinë, Trudeau i dha Donald Trump, një fotografi të presidentit amerikan dhe babait të tij, Pierre Trudeau, kur ky i fundit ishte kryeministër, në 1981.

Dy liderët, dhe vajza e Trump, Ivanka, po ashtu, kryesuan edhe një diskutim mbi punonjëset femra dhe ranë dakord për ngritjen e një task force që do të punonte për avancimin e grave në udhëheqjen e biznesit dhe sipërmarrjeve.

Kjo task forcë e përbashkët, mund të ndihmojë në zbutjen e tensioneve mbi disa masa proteksioniste që Trump ka ndërmarrë që nga ulja në detyrë në janar. Ndërsa Trump ka mbajtur një qëndrim të ashpër mbi emigracionin, bashkëbiseduesi i tij ka një pozicion krejt të ndryshëm.

Lideri kanadez ka tërhequr shumë vëmendje pas pranimit të 40 mijë refugjatëve dhe ka premtuar se do të mirëpriten të gjithë ata që i largohen persekutimit dhe luftës.

Top Channel