Federica Mogherini do të largohet herët në mëngjes të premten, por përpara se të largohet nga Tirana do të ketë një takim të veçantë me kryetarin e Partisë Demokratike, Lulzim Basha.
Zoti Basha nuk do të jetë i vetëm në takim, por ndryshe nga delegacioni i nivelit të lartë, që përzgjodhi në takimin me Sekretarin amerikan të Shtetit, John Kerry, në takimin me Mogherinin ai do të shoqërohet nga deputetët që u përfshinë në konfliktin me kryeministrin, të enjten e shkuar në Parlament.
Albina Deda, Arbiola Halimi, Gent Strazimiri, si dhe nga kryetarja e Komisionit të Integrimit, Majlinda Bregu, që kundërshtoi edhe publikisht politikën e gjuajtjes me vezë, apo pjesëmarrjen në protestën e grave deputete për fjalorin e kryeministrit.
I vetmi që është ruajtur nga delegacioni i takimit me Kerryn është Aldo Bumçi, nënkryetar i Komisionit të Jashtëm. Përbërja e delegacionit të opozitës në takimin me Federica Mogherinin është një sinjal se, gjuha që do të përdorë Lulzim Basha do të jetë e ashpër, por gjithsesi jo si ajo e përdorur gjatë protestës së grave demokrate në bulevard, përpara Kryeministrisë.
Top Channel
