Shqiptari ekstradohet në SHBA, kërkohet për krime kibernetike, “gllabëroi” mbi 232 mijë dollarë
Fondi për të Drejtën Humanitare në Kosovë ka prezantuar raportin me titull “Drejtësia që vonohet”, që lidhet me gjykimet e krimeve të luftës dhe veprave penale të motivuara etnikisht dhe politikisht. Bazuar në këtë raport, nga përfundimi i luftës janë ngritur 39 aktakuza, ku përfshihen 9 shqiptarë, 37 serbë dhe 2 shtetas të kombësive të tjera.
Koordinatorja e këtij projekti, Anka Kurteshi-Hajdari tha se, në Kosovë thuajse nuk ka fare drejtësi për viktimat e krimeve të rënda. Bazuar te të dhënat e hartuara, ajo nënvizoi se nga janari i vitit 1998 e deri në dhjetor të vitit 2000, në Kosovë janë vrarë dhe zhdukur 13 mijë e 535 persona.
“Që përshtypjet të jenë edhe më të fuqishme, për pafuqinë e sistemit të pushtetit të ligjit, i cili ndjek kriminelët e luftës, flasin edhe të dhënat, që deri më tani janë dënuar për krime lufte në Kosovë vetëm 20 persona, me vendimin të prerë. Prej tyre, 17 shqiptarë dhe 3 serbë dhe, në fund, vlen të përmendet se aktualisht para gjykatës, në faza të ndryshme të procedurës, gjenden 10 lëndë për krime lufte, me 37 persona të akuzuar; 32 shqiptarë dhe 5 serbë”, tha Anka Kurteshi-Hajdari, koordinatore e projektit.
Kurteshi-Hajdari tha se përgjegjësia për këtë drejtësi të vonuar është si e ndërkombëtarëve, ashtu edhe e vendorëve.
“Të gjitha rastet e krimeve të luftës, fillimisht janë trajtuar nga UNMIK-u, pastaj i janë transferuar EULEX-it. Është me rëndësi, që suksesi apo përgjegjësia për trajtimin e ngecjeve eventuale në trajtimin e këtyre rasteve, i takon drejtësisë ndërkombëtare, po aq sa i takon edhe institucioneve vendore”, tha Lirak Çelaj, zv.ministër i Drejtësisë.
Ndërsa ushtruesja e detyrës së kryeprokurores, në Prokurorinë Speciale të Republikës së Kosovës, Sevdije Morina tha se Prokuroria Speciale ballafaqohet me mungesë të kapaciteteve njerëzore.
“Edhe ato raste, që i kanë në duar prokurorët vendorë dhe kërkojnë të lëshojnë autorizime, përgjigjja e hetuesve nga policia kryesisht është se nuk kanë kapacitete, se janë të tjera raste me prioritet, dhe se nuk mund të hetohet rasti i caktuar tani për tani. Këto zvarritje dhe ky nivel i kapaciteteve, si në Prokurori ashtu edhe në polici, do të ndikojnë në ndjekjen e këtyre veprave penale, krimeve të luftës, ndërsa të dëmtuarit do të vazhdojnë të mos i realizojnë të drejtat e tyre, për të pasur një gjykim të drejtë dhe në kohë të arsyeshme”, tha Sevdije Morina, kryeprokurore në PSRK.
Morina tha se janë prapa me themelimin e një departamenti të posaçëm për krime lufte, pasi shumë shpejt të gjitha këto raste duhet të barten te prokurorët vendorë.
Top Channel