Kryeprokurori i Shtetit, Lumezi në pikëpyetje

Kjo, pasi përveç dekretit përfundimtar që duhet të nxjerrë presidentja, edhe Gjykata Kushtetutuese duhet të marrë një vendim, pasi procesi i zgjedhjes së kryeprokurorit ishte kundërshtuar herën e parë.

Në një përgjigje elektronike, zyra e presidentes së Kosovës thotë se, zonja Jahjaga do të veprojë në përputhje me ligjin, Kushtetutën dhe afatet e përcaktuara ligjore, që në këtë rast janë dy muaj.

“Ligji e përcakton se Këshilli Prokurorial i Kosovës i bën propozimin Presidentes për emërimin e kryeprokurorit të Shtetit, pas një procesi të drejtë, të besueshëm dhe të paanshëm, për të përzgjedhur një person i cili ndërton besim nga vetë procesi, por që këtë besim në sistemin e drejtësisë e bart edhe tek qytetarët”, thuhet në përgjigjen e Presidencës.

Nga ana tjetër, Gjykata Kushtetuese nuk tregon se kur do të vendosë lidhur me ligjshmërinë e vendimit të Këshillit Prokurorial për emërimin e Lumezit.

Zëdhënësi Veton Dula konfirmoi se, gjykata është informuar me proçedurën e emërimit dhe të propozimit për emërim të kryeprokurorit të Shtetit.

Në një komunikim me e-mail ai tha se, Kushtetuesja do të shqyrtojë zbatimin e rekomandimeve nga aktgjykimi i mëparshëm dhe se vendimi do të merret në përputhje me Kushtetutën. Kushtetuesja në korrik 2014 kishte vendosur të anulonte zgjedhjen e kryeprokurorit pas ankesës së dy kandidatëve.

Gjykata e kishte kthyer procesin në fillim. Në proçedurën e dytë, 5 kandidatët për kryeprokuror janë tërehequr nga gara me arsyetimin se është proces i komprometuar. Këshilli Prokurorial e vazhdoi atë me kandidatin e vetëm, Aleksandër Lumezi.

Top Channel