Mijëra qytetarë kanë protestuar sërish të shtunën në Gjakovë kundër deklaratave të ministrit për Kthim dhe Komunitete, Aleksandar Jabllanoviç, i cili ditë më parë i quajti “egërsira” familjarët e të zhdukurve të këtij qyteti.
Protestuesve i janë bashkuar edhe deputetë të Kuvendit të Kosovës nga parti të ndryshme politike. Teksa kanë marshuar në rrugët e Gjakovës për t’u ndalur në qendër të qytetit, protestuesit kanë mbajtur në duar pankarta me mbishkrime “Lista Serbska shporru”, “O me popullin, o me Jabllanoviçin”, “Jemi kundër fashizmit”, etj.
Nysrete Kumnova nga shoqata “Thirrjet e Nënave” tha se, kush do të besonte që pas 15 vjetësh në qeverinë e Kosovës do të dilte një ministër, i cili pa turp do të ofendonte nënat e Kosovës.
Ndërsa, Driton Çaushi, koordinator i lëvizjes Vetëvendosje në Gjakovë, tha se janë mbledhur sepse është shkelur dinjiteti i qytetarëve të Kosovës, ndërsa kritikoi për heshtje kryeministrin Isa Mustafa, ish-kryeministrin Hashim Thaçi dhe presidenten Atifete Jahjaga.
Çaushi shtoi se, nëse kërkesa për shkarkimin e Aleksandër Jabllanoviç nuk realizohet, atëherë do të protestohet edhe në Prishtinë. Protesta e organizuar nga Vetëvendosje dhe shoqata “Thirrjet e Nënave” zgjati një orë dhe qytetarët u shpërndanë të qetë.
Top Channel
