Kosova sanksione Rusisë

Kryeministri Hashim Thaçi ka deklaruar se sanksionet ndaj Moskës zyrtare hyjnë në fuqi menjëherë, ndërsa ka urdhëruar ministritë e linjës që të zbatojnë me përpikmëri sanksionet e ndërmarra.

“Qeveria e Kosovës mbështet sanksionet e institucioneve të Bashkimit Evropian dhe të Shteteve të Bashkuara të Amerikës ndaj autoriteteve të Federatës Ruse. Sanksionet e qeverisë së Kosovës janë të përcaktuara në shtojcën 1 të vendimit që po nxjerrim. Sanksionet do të jenë në fuqi deri në një vendim tjetër, varësisht nga rrethanat që mund të krijohen”, deklaroi Thaçi.

Ministri i Punëve të Jashtme, Enver Hoxhaj ka thënë se Kosova po i miraton sanksionet ndaj Rusisë për shkak të detyrimeve që ka në kuadër të Marrëveshjes së Stabilizim Asocimit.

“Ky vendim parashikon që një listë institucionesh financiare, shoqëri që operojnë në sektorin e energjisë, në sektorin e prodhimit të armëve, autoritete të vetëshpallura politike në territorin e Ukrainës, si dhe disa individë e zyrtarë të lartë do t’u duhet të ballafaqohen me sanksionet që do të vendosë Republika e Kosovës”, tha Hoxhaj.

Pas ministrit të Jashtëm, ministri i Financave Besim Beqaj bëri të ditur se në tregun kosovar nuk ka produkte ruse, mirëpo ai shtoi se Kosova është përdorur si vend tranzit i atyre mallrave nga Rusia. Por me sanksionet e miratuara, Beqaj u zotua se inteligjenca financiare dhe doganat nuk do të lejojnë asnjë tranzit.

Gjatë mbledhjes së qeverisë u miratuan të mërkurën edhe shpronësimet e disa tokave që preken nga ndërtimi i Linjës Energjetike 400kV mes Kosovës dhe Shqipërisë.

Top Channel