Pas dështimit të tyre në Botërorin e këtij viti në Brazil, Spanja shfaqet me një fytyrë të re, teksa përgatiten për mbrojtjen e titullit kampion Europe me një ndeshje miqësore ndaj Francës, takim që do të luhet këtë të enjte.
Vetëm dy muaj pas eliminimit në fazën e grupeve, edhe pse ishin kampionë Bote në fuqi në Brazil, trajneri Vicente del Bosque ka krijuar një skuadër të përzierë mes fytyrave tepër të njohura dhe yjet e së ardhmes për takimin që do të luhet në “Stade de France”, apo stadiumin ku do të luhet edhe finalja e Euro 2016.
Pas tërheqjes nga kombëtarja nga ana e David Villas, këtë hap ndoqën edhe Xavi Hernandez, Xabi Alonso. Ndërsa Pepe Reina, Fernando Torres dhe Juan Mata janë lënë jashtë saj për shkaqe problemesh fizike, kurse dëmtimet kanë detyruar mospjesëmarrjen e Pique, Iniesta dhe Javi Martinez.
Sa i përket fytyrave të reja, 5 lojtarë priten të debutojnë për herë të parë me fanelën e kombëtares spanjolle, ndërsa 4 janë nën 23 vjeç, përfshi edhe sulmuesin e Valencias Paco Alcacer. Disa të tjerë, si 28-vjeçari i Atletico Madridit, Raul Garcia, do të duhen të presin më shumë për shanset e tyre. Ndërkohë, 22-vjeçari i Atleticos, Koke, i cili mori pjesë edhe në Botëror, tashmë pritet të marrë më shumë përgjegjësi mbi supe.
“Është një ekip për të tashmen dhe për 2 vitet e ardhshme”, shpjegoi Del Bosque pas zbulimit të skuadrës së tij, përpara përgatitjeve për përballjen me Francën, e që do të pasohet ditën e hënë nga ndeshja e parë kualifikuese për Euro 2016 ndaj Maqedonisë, në Valencia.
Ndryshe nga Spanja, Franca vjen pas një Botërori me reputacion tepër të ngritur, pas atij eliminimi në çerekfinale nga kampionët e rinj të Botës, Gjermania.
Trajneri Didier Deschamps do të nisë një fushatë 2-vjeçare miqësoresh, përpara se Franca të mirëpresë zhvillimin e Euro 2016, ku ata priten të aktivizojnë një skuadër tepër të konsoliduar, gjithashtu një përzierje mes të rinjve dhe lojtarëve me eksperiencë.
Për ndeshjen miqësore ndaj Serbisë, në Beograd, Deschamps ka bërë vetëm 3 ndryshime, duke rikthyer portierin e Marsejës Steve Mandanda, në vend të të larguarit Mickael Landreau.
Sulmuesi i Lyon, Alexandre Lacazette, dhe mbrojtësi i Barcelonës, Jeremy Mathieu, do të luajnë gjithashtu, duke zëvendësuar dyshen e dëmtuar të Arsenalit, Giroud dhe Koscielny.
“Kemi dy ndeshje shumë afër njëra-tjetrës, por ekipi që do të zbresë në fushë të enjten do të jetë thuajse i ngjashëm me atë që luajti ndaj Gjermanisë”, tha Deschamps, duke shtuar se prioriteti i tij është sigurimi që ekipi të jetë “sa më kompetitiv brenda këtyre 2 viteve”.
Top Channel
