OKB ka bërë të ditur se ekstremistët e ISIS-ISIL kanë urdhëruar të gjitha gratë dhe vajzat në Mosul, në veri të Irakut, t’i nënshtrohen gjymtimit të organeve gjenitale.
Zyrtarja e OKB, Jacqueline Badcock tha se dekreti fetar “fatwa” aplikohet ndaj femrave të grupmoshës 11-46 vjeçe. Ajo shtoi se dekreti i paprecedent i lëshuar nga ISIS në kontrollin e qytetit përbënte një shqetësim shumë të madh.
Iraku po përballet me një kryengritje të sunitëve, të udhëhequr nga radikalët e ISIS, teksa disa qytete në veri-perëndim të vendit janë zaptuar prej tyre.
Rituali i gjymtimit të gjenitalit femëror praktikohet nga disa komunitete në Afrikë, Lindjen e Mesme dhe Azi, me shpresën se ai i përgatit ato për moshën e rritur, apo martesën.
Gjymtimi i tillë shkakton rreziqe të mëdha shëndetësore për gratë, përfshi këtu gjakderdhje të rëndë, probleme me urinimin, infeksione të ndryshme, shterpësi, si dhe rrezikun gjithnjë e në rritje të lindjes së foshnjave të vdekura.
Top Channel