Të paktën 31 fëmijë kanë humbur jetën të hënën në Kolumbi, si pasojë e një zjarri që përfshiu autobusin me të cilin po udhëtonin drejt një shkolle fetare.
Ngjarja ka ndodhur në rajonin e Magdalenës, në veri të vendit. “Në bord ndodheshin vetëm fëmijët dhe shoferi”, deklaroi për mediat një zyrtar i bashkisë së Fundasionit, lokaliteti ku ndodhi dhe tragjedia.
Ndërsa përgjegjësi i policisë kolumbiane, Rodolfo Palomino ka deklaruar se po hetohet për të përcaktuar shkaqet e zjarrit në autobus, që mund të ketë qenë një defekt mekanik.
Ndërkohë, shoferi i mjetit ka marrë plagë të rënda. “Personat e plagosur kanë djegie të gradës së tretë dhe shumë prej tyre janë ende në gjendje kritike për jetën në spitalet e rajonit”, ka bërë të ditur Kryqi i Kuq.
Lidhur me ngjarjen ka reaguar edhe vetë presidenti i Kolumbisë, Juan Manuel Santos, që ka saktësuar se fëmijët ishin nxënës të një shkolle fetare.
Mjeti, që transportonte fëmijë të moshës nga 1 në 8 vjeç, shpërtheu rreth mesditës dhe më pas u shkatërrua tërësisht nga flakët.
Operacionet e shpëtimit janë zhvilluar përgjatë gjithë ditës, për të rekuperuar trupat e karbonizuar të të miturve, që po ktheheshin nga një ceremoni fetare.
Drejtuesi i autobusit është parë nga dëshmitarë të mbante një çisternë benzine para zjarrit, duke bërë që autoritetet të dyshojnë se transportonte benzinë kontrabandë.
Top Channel
