Reforma në arsimin e lartë

Ky komision po përpiqet t’i japë një tjetër dimension universitetit shqiptar publik, duke rritur autoniminë por edhe cilësinë. Profesor Barbullushi sqaron se bordi akademik, i cili në përbërje do të ketë gjithë stafin pedagogjik, do të ketë të drejtën për të përzgjedhur senatin dhe anëtarët e tij do të përzgjedhin rektorin.

Nga këto zgjedhje përjashtohen studentët, të cilët do të jenë pjesë e komiteteve që do të vlerësojnë cilësinë e studimeve.

“Në themel të zgjedhjeve është bordi akademik, që do të thotë përfaqësi e gjithë stafit akademik. Është bordi që do zgjedhë senatorët, të cilët tashmë do të zgjedhin rektorin, këshilli shkencor do zgjedhë dekanët dhe në fund janë anëtarët e departamenteve që do të zgjedhin shefin e tyre”, deklaron Barbullushi.

Një pikë mjaft e debatueshme mbetet përzgjedhja e menaxherëve të cilët do të administrojnë financat e departamenteve në kërkimin shkencor.

“Bordi administrativ i votuar asistohet nga bordi akademik, zgjedh një drejtor që do të ketë influencë në të gjitha bërthamat e departamentit, sidomos tek ata që kanë dimensione më të mëdha”, sqaron Barbullushi.

Profesor Barbullushi tha se nuk është e vërtetë që tarifat për studentet do të rriten 10 herë. Qeveria do të miratojë një dysheme dhe vetë universitetet do të përcaktojnë tarifat dhe numrin e studentëve në bazë të paramatrave të cilësisë.

“Çdo universitet ka të drejtë të operojë me tarifat e tij. Ne sugjerojmë rritjen e tyre, por shteti do vendosë një tavan mbi të cilin tarifat nuk do të shkojnë. Çdo student që nuk do ketë mundësi financiare do të marrë bursë dhe çdo student i ekselencës do ketë mbështetje”, shton Barbullushi.

Komisioni për reformën në arsimin e lartë po përpiqet t’i japë universiteteve një tjetër mënyrë drejtimi që i con drejt cilësisë dhe autonomisë, por që do të shkund thellësisht universitetet nga mënyra aktuale e drejtimit.

Top Channel