Një ish-kolonel i ushtrisë braziliane, që pranoi torturat dhe vrasjet e të burgosurve politikë gjatë regjimit ushtarak të viteve 80, është gjetur i vdekur.
Paulo Malhes, 76 vjeç, është vrarë nga tre persona që hynë në shtëpinë e tij jashtë Rio de Zhaneiros ditën e enjte, njofton policia lokale.
Muajin e kaluar ai kishte thënë se kurrë nuk ishte penduar për vrasjen e “aq njerëzve sa duhej” dhe për torturat që kishte ushtruar ndaj shumë të tjerëve.
Rreth 500 persona u zhdukën ose u vranë në Brazil kur vendi qeverisej nga regjimi ushtarak mes viteve 1964-1985. Shumë prej tyre u mbajtën në burgim dhe u torturuan, përfshirë këtu presidenten aktuale të vendit Dilma Rousseff.
Sipas bashkëshortes së tij, koloneli Malhaes u mbyt nga tre persona që hynë në shtëpinë e tij. Policia tha se personat në fjalë kishin vjedhur kompjutera dhe disa armë.
Avokati i njohur brazilian Wadih Damous deklaroi se agresorët mund të ishin në kërkim të dosjeve sekrete që koloneli zotëronte.
“Ai ishte një agjent i rëndësishëm i represionit politik gjatë diktaturës dhe zotëronte shumë informacione për ngjarjet që ndodhën prapa skenave në atë kohë”, deklaroi Damous.
Muajin e kaluar koloneli Malhaes u shfaq në Komisionin Kombëtar të së Vërtetës, që po heton abuzimet e së kaluarës në Brazil.
Top Channel