“PD shpif ndaj ushtrisë dhe policisë”

“Sulmi i vazhdueshëm i opozitës me shpifje, akuza të paqena ndaj ushtrisë dhe policisë, është jo vetëm i ulët por dhe shprehje e dëshpërimit të një opozite, që ende nuk e ka kuptuar arsyen se përse më 23 Qershor populli e votoi për të dalë në opozitë. Qeveria e kaluar la pas një situatë të rënduar sa i takon sigurisë. Drejtuesit politikë të forcave të Rendit dhe të Forcave të Armatosura ishin zhytur në korrupsion dhe ishin kthyer në një simbol të paaftësisë, si dhe lidhjeve me krimin e organizuar dhe trafikun. Pikërisht tani, kur çdo ditë dalin në pah fakte të reja, që dëshmojnë shpërdorimin e detyrës të ish-funksionarëve të lartë të qeverisë së kaluar, opozita jo vetëm ka marrë në mbrojtje politike shpërdoruesit e detyrës, por sulmon në mënyrë të turpshme Forcat e Armatosura dhe forcat e Rendit”, u shpreh deputeti socialist, Besnik Bare.

PD: Ushtria në trafikun e drogës
Opozita, kërkesë për seancë dëgjimore me ministren Kodheli

Por, nga selia blu u përgjigj deputeti Flamur Noka. Ai akuzoi sërish Ministrinë e Mbrojtjes për trafikun e drogës dhe tha se nesër, në Komisionin e Sigurisë, do të depozitohet një kërkesë për seancë dëgjimore me ministren Kodheli, për këtë çështje.

“Ndërkohë që Forcat e Armatosura gjenden përballë akuzës më të rëndë në historinë e shtetit shqiptar, se bazat e saj janë përfshirë në trafikun e drogës, ministrja e Mbrojtjes Mimi Kodheli ka 4 ditë që është zhdukur dhe, papritur, na del në skenë një ambientalist. Ambientalisti që doli sot nuk iu përgjigj dot pyetjeve të opozitës dhe të mbarë publikut tashmë, se a ka informacion ministrja e Mbrojtjes për përfshirjen e institucionit në trafikun e drogës. Zonja ministre, mos u fshih, por përgjigju! Partia Demokratike do të depozitojë nesër në Komisionin e Sigurisë, kërkesën për seancë dëgjimore urgjente me ministren e Mbrojtjes, për ta zbardhur këtë skandal, më i rëndi në historinë e Forcave të Armatosura”, deklaroi nga selia blu, deputeti Flamur Noka.

Top Channel