Dule në Selanik, takon zyrtarët grekë

Në takim është folur midis të tjerash  për ndihmën që po jep Athina zyrtare në çështjen e integrimit të Shqipërisë në BE, për negociatat e vështira në problemin  e toponimeve si dhe për risjelljen në fuqi të ligjit për pensionet e minoritareve.

“Me gëzim të madh kemi pritur sot, në Ministrinë e Maqedonisë dhe Trakes, miq nga vendi fqinj dhe mik i Shqipërisë, miq me origjinë greke,personalitete politike, të cilët me veprën e tyre ndihmojnë akoma më shumë, në mënyrë që minoriteti grek në Shqipëri të jetë realisht një urë miqësie midis dy vendeve”, tha Theodhoros Karaoglou, ministri i Maqedonisë dhe Trakes.

“Patëm një takim në të cilin diskutuam situatën e të drejtave të pjesëtarëve të minoritetit grek në Shqipëri ,marrëdhëniet dypalëshe, me emfazë në perspektivën integruese të vendit tonë dhe marrjen e statusit të vendit- kandidat gjatë kohës së presidencës greke, në muajin Qershor, si dhe marrëdhëniet me gjerë në rajon”, tha Vangjel Dule, nënkryetari i Parlamentit shqiptar.

Dule eshte pritur gjithashtu edhe nga kryebashkiaku i Selanikut, Janis Boutaris në një takim të ngrohtë ku është folur për problemet e pushtetit lokal dhe shkëmbimin e eksperiencës sidomos me bashkitë e Korçës dhe të Durrësit që janë binjakëzuar me qytetin më të madh verior të Greqisë .
“Takimi kishte të bënte edhe me çështjet e përgjithshme të minoritetit grek në Shqipëri si dhe me përshpejtimin e frymës së bashkëpunimit të Bashkisë së Selanikut që është binjakëzuar prej kohësh me bashkinë e Korçës dhe së fundi me bashkinë e Durrësit”, deklaroi Janis Boutaris, Kryebashkiaku i Selanikut.

“Krahas kënaqësisë që është gjithnjë e dukshme në takimet me z. Boutaris, takimi kishte edhe një përmbajtje shumë domethënëse. Ekzistojnë shumë hapësira bashkëpunimi në të gjitha drejtimet, duke filluar nga bashkëpunimi në nivelin e pushtetit vendor, por edhe më gjerë”, tha Dule.
Më pas në ceremoninë vjetore të prerjes së pites ,kreu i Omonias së Selanikut, Kristo Bregu ka paraqitur edhe dy pjesëtarë te minoritetit , Agjeliki Filo dhe Eleni Louarasi, të cilat do të jenë kandidate në zgjedhjet e pushtetit lokal, përkatësisht si  këshilltarë për prefekturën dhe bashkinë. Në fjalën e tij përshëndetëse kandidati për guvernator i Maqedonisë Qendrore, Janis Joanidhis ka theksuar se çështja e pensioneve të minoritarëve është në prioritetet kryesore të qeverisë greke.

Top Channel