Rrëzimi i MH370, vetvrasje?

Deklarata është evazive dhe teoritë mbi zhdukjen e avionit në datën tetë të këtij muaji vazhdojnë të vërshojnë. Së fundmi ajo që po qarkullon bën fjalë për një ‘vetvrasje’. Sipas ekspertëve të fluturimeve, avioni ka fluturuar në lartësinë mbi 12.500 metër për rreth 23 minuta.

Në rregullore, fluturimi në të tillë lartësi i avionëve ndalohet sepse humbet oksigjeni dhe ai i siguruar nga maskat nuk zgjat më shumë se 12 minuta. Burime anonime cituara nga mediat ndërkombëtare thonë se ‘pak pas komunikimit të fundit me tokën, radarë ushtarakë kanë pikasur avionin teksa fluturonte në një lartësi nga 12 mijë e 500 metër në 13 mijë metër lartësi për rreth 23 minuta. Më pas, avioni ka humbur lartësinë dhe ka rënë.

Besohet se të gjithë pasagjerët dhe ekuipazhi i avionit si pasojë e mungesës së oksigjenit, ose pranisë së pakët të tij, kanë humbur ndjenjat dhe kanë qenë të pavetëdijshëm në momentin e përplasjes, që mendohet se është diku në jug të ujërave të Oqeanit Indian.

“Avioni ka fluturuar në këtë lartësi për 23 minuta, më pas ka rënë. Oksigjeni në këtë lartësi nuk zgjat më shumë se 12 minuta dhe pasagjerët kanë humbur ndjenjat dhe kanë qenë të pavetëdijshëm para përplasjes”, citohet nga DailyMail një burim anonim nga ushtria britanike.

Në bazë të kësaj teorie po përpiqet të përllogaritet trajektorja e ndjekur nga avioni në momentin e rëniës së lirë, ndërsa dyshohet se presioni i ajrit në kabinë nuk është rregulluar qëllimisht nga njëri prej pilotëve të fluturimit.

Top Channel