Katër persona besohen të kenë vdekur, pas rrëzimit të një helikopteri në bregdetin verior të Norfolk-ut, në Britaninë e Madhe, bën të ditur policia.
Helikopteri është i tipit “HH-60G Pave Hawk”, nga baza e “RAF Lakenheath” në Suffolk, konfirmon një zëdhënës i Forcave Ajrore amerikane.
Shërbimet e emergjencës ndodhen në vendngjarje, në zonën Cley, ndërkohë që kanë bllokuar zonën prej 400 metrash.
Gjashtë mjete nga Shërbimi Zjarrfikës i Norfolk-ut janë aktualisht të pranishëm, përfshi edhe 4 pompa uji, një ujëmbajtës dhe një njësi për mbrojtjen e mjedisit.
Një zëdhënës tha se pajisja e parë mbërriti në vendngjarje më 20:53. Fillimisht u mendua se helikopteri kishte rënë në Detin e Veriut.
Zëdhënësi i Institucionit Kombëtar Mbretëror të Shpëtimit tha se “u ishte kërkuar ndihmë për 3 varka shpëtimi, në përgjigje të incidentit”.
Ekipet e shpëtimit nga rajonet e Wells-it, Sheringham-it dhe Cromer-it (në jug-lindje të Anglisë) u nisën menjëherë pas kërkesës së rojeve bregdetare, por u tërhoqën pas kur u konfirmua se helikopteri ishte rrëzuar mbi tokë dhe jo në det”.
Top Channel
