Pakistan, bllokohet rruga e furnizimit të NATO-s

Politikani opozitar Imran Khan bëri thirrje për këtë aksion dhe deklaroi se ai do të vazhdojë derisa amerikanët t’u japin fund sulmeve me dronë në veri-perëndim të Pakistanit.

Ai i konsideron sulme të tilla si shkaku i vdekjeve të civilëve dhe i dëmtimeve të përpjekjeve për një paqe me talebanët.

Protesta vjen pothuajse një muaj pasi shefi i talebanëve pakistanezë u vra në një sulm me avion të telekomanduar në një kompleks në Uaziristanin Verior.

Ai kishte dhënë sinjale se ishte i gatshëm të bisedonte, por vdekja erdhi vetëm një ditë para se ekipet e negociatorëve të takoheshin.

Pasardhësi i tij, Mullah Fazlullah, një militant me reputacionin e një njeriu barbar, duket se ka refuzuar çdo iniciativë paqeje.

Kjo bllokadë është bërë në rrugën në provincën veri-perëndimore të Pakistanit, Kiber Paktunkua, që përdoret për transportimin e mallrave për në Afganistan.

Korrespondenti i BBC në Peshauar thotë se protestuesit kanë marrë ligjin në duart e tyre duke vendosur se kush mund të kalojë për në vendin fqinj e kush jo.

Ata kanë sulmuar kamionët dhe shoferët e tyre dhe kanë kthyer mbrapsht automjete që transportonin furnizimet për trupat e NATO-s.

Top Channel