Joseph Kony, negociata për t’u dorëzuar

Një zëdhënës i qeverisë afrikane tha për BBC se Kony ndodhej në vend, por dëshironte që t’i garantohej siguria përpara se të vetëdorëzohej.

Kony, lider i Ushtrisë së Rezistencës së Zotit kërkohet nga Gjykata Ndërkombëtare Penale për krime lufte. Shtetet e Bashkuara kanë ofruar deri në 5 milionë dollarë shpërblim për informacione që mund të çojnë në arrestimin e tij.

Kjo është hera e parë në shumë vite që vendndodhja e Konyt është zbuluar. Gjithashtu, të mërkurën i dërguari i posaçëm i Unionit Afrikan në URZ, Francisco Madeira tha për Këshillin e Sigurimit të OKB-së se Koni vuante nga një sëmundje e rëndë.

Në prill ushtria e Ugandës ndërpreu kërkimet për të në Republikën e Afrikës Qendrore për shkak të armiqësisë së qeverisë që u krijua kur forcat rebele morën pushtetin atje.

Joseph Kony vlerësohet se ka nën urdhërat e tij nga 200-500 luftëtarë, me të cilët ka zhvilluar luftë në Uganda dhe në rajonin afrikan për më shumë se dy dekada.

Ai thotë se misioni i URZ është instalimi në Uganda i një qeverie të bazuar në Dhjetë Urdhëresat e Biblës. Por rebelët e tij kanë terrorizuar zona të tëra në Republikën Demokratike të Kongos, Sudanin Jugor dhe RAQ.

Ai kërkohet nga gjykata e Hagës për dhunime, gjymtime dhe vrasje të civilëve, si dhe për rekrutimin e fëmijëve, djemtë për të shërbyer si ushtarë dhe femrat si skllave seksi.

Top Channel