Auditimi i bizneseve

“Audituesit mund të përfshihen edhe në kryerjen e shërbimit të auditimit për shërbimet tatimore për kompanitë më të mëdha në vend dhe që kërkon jo vetëm zbatim të standardeve cilësore, por edhe rritjen dhe rivlerësimin e përgjegjësisë së tyre. Ne mendojmë se kjo mund të nisë me disa entitete në trajtën e shërbimeve pilot me fokus primar formalizimin e mëtejshëm të ekonomisë”, tha Hysen Cela.

Në konferencën e 12 vjetore të ekspertëve kontabël të Mesdheut, ministri i Financave, Shkëlqim Cani tha se Qeveria është duke punuar me Bankën Botërore për të fuqizuar auditimin edhe në sektorin privat, si një nga masat kryesore në luftën kundër informalitetit.

“Ne e shohim këtë profesion jo vetëm si garanci të certifikimit më gjerë të raportimit financiar, por si një garanci të interesit publik dhe si një element, i cili ndikon në mënyrë të konsiderueshme në përmirësimin e cilësisë të pasqyrave financiare. Janë ato pasqyra që ne shqiptarët e dimë mirë që kanë mangësi thelbësore, apo bëhen dy ose  tre pasqyra njëherësh për raportime të ndryshme”, tha Cani.

Pak javë më parë Qeveria kontaktoi “Deloitte’ për të audituar borxhet e fshehura të shtetit. Ministri i Zhvillimit Ekonomik Arben Ahmetaj theksoi se shumë shpejt do të ketë masa për të rritur transparencën e të dhënave financiare edhe në sektorin privat.

“Qeveria do të nxjerrë një rregull, i cili do të detyrojë bankat dhe deri kompanitë e tatimet që të jenë në linjë me njëra-tjetrën për ato bilance të cilat ngarkohen me kredi. Nuk mund të vijë një kompani, të ketë një bilanc ‘x’ në tatime dhe e njëjta kompani të shkojë me një bilanc ‘y’ në bankë, gjë që për profesionin tuaj, për shtetin, për interesin publik, për të vërtetën është e papranueshme”, tha Ahmetaj.

Në konferencën, e organizuar në Tiranë nga Instituti i Akspertëve Kontabël të Autorizuar, veç drejtuesve nga organizatat më të mëdha botërore të auditimit, mori pjesë edhe ambasadori i Bashkimit Europian. Ettore Sequi deklaroi se për BE-në transparenca dhe besueshmëria e të dhënave financiare kanë një rëndësi kritike ndaj duke inkurajuar Qeverinë që të fuqizojë pozitat e auditimit.  

Top Channel