Manaxheri i pilotit spanjoll, Fernando Alonso, përjashtoi çdo mundësi që klienti i tij të ndryshojë skuadër në sezonin e ardhshëm, nëse sërish nuk do të arrijë të fitojë titullin kampion në timonin e një Ferrari në këtë Botëror.
“Të ndryshojë pasi nuk fiton? Kjo nuk është në karakterin e Fernandos. Ai ka fituar 30 gara dhe është piloti i katërt me më shumë gara të fituar. Në Formulën 1, ka shumë gjëra të tjera që kanë rëndësi përveç fitores, tifozët, sponsorat e shumë të tjerë”, deklaroi Luis Garcia Abad.
“Ka pasur pilotë që janë tërhequr nga Formula 1 pa fituar një garë të vetme. Çfarë duhet të bënin ata? Por, mbi të gjitha, nuk ekziston asnjë vullnet për t’u larguar nga Ferrari, as nga ana e Fernados dhe as nga pala e skuadrës. Me sukseset që ka arritur deri tani, ai është një ikonë botërore dhe Ferrari është një skuadër histoprike”, shtoi Abad.
Duke folur për çështje të tjera, jashtë Formulës 1, Abad shprehu keqardhjen që pavarësisht rezultateve të shkëlqyera që ka arritur Spanja në sporte vitet e fundit, përsëri nuk ka një plan për të krijuar një skuadër Formule 1.
Top Channel
