SHBA, skeptike për ofertën e Koresë së Veriut

Një zëdhënës i Shtëpisë së Bardhë deklaroi ditën e hënë se “Korea e Veriut do të gjykohet nga veprimet dhe jo nga fjalët e saj”.

“Është në dëshirën tonë që të mbajmë negociata të besueshme me Penianin, por këto bisedime nuk mund të përfshijnë përjashtime për detyrimet që Korea e Veriut ka ndaj botës, ndaj rezolutave të Këshillit të Sigurimit dhe objektivit të çarmatimit bërthamor”, deklaroi zëdhënësi.

Nga ana e tij, shefi i stafit të presidentit Obama, Denis McDonough, theksoi: “Do t’i gjykojmë në bazë të veprimeve të tyre dhe jo mbi fjalët e bukura. Ata nuk do t’i shpëtojnë sanksioneve të rënda, objekt i të cilave janë bërë aktualisht, pa veprime konkrete”.

Në të shkuarën, në retorikën e tij agresive, Peniani vazhdimisht e ka konsideruar qeverinë koreanojugore si një “kukull” të SHBA-së, duke arsyetuar se për çdo vendim në rajon, përgjegjëse është Shtëpia e Bardhë.

Zyrtarë amerikanë dhe koreanoveriorë janë takuar më parë në mënyrë të vazhdueshme për çështjen e armëve bërthamore, por për herë të fundit, të dyja palët janë ulur në tryezën e bisedimeve në vitin 2009.

Përshkallëzimi i tensioneve dhe gjuha e ashpër e vendit komunist nisi në muajin dhjetor të vitit të kaluar kur Peniani testoi me sukses një raketë me rreze të gjatë veprimi.

Vetë Veriu deklaroi se synonte hedhjen e një sateliti në hapësirë, ndërsa SHBA, Koreja e Jugut, Japonia dhe vendet e Europës akuzuan Penianin se po kërkonte të zgjeronte rrezen e raketave që mund të transportonin mbushje bërthamore.

Por, pavarësisht tensioneve dhe kërcënimeve të perëndimit për të tjera sanksione, vendi komunist dy muaj më vonë ndërmerr një test bërthamor, i treti në historinë e vendit.

Testi pasoi reagimin e fortë ndërkombëtar dhe sanksione të OKB-së, që për herë të parë, së fundmi, morën dritën jeshile edhe nga Rusia dhe Kina, kjo e fundit aleate tradicionale e Penianit.

Sanksionet dhe një stërvitje e përbashkët ushtarake mes SHBA dhe Koresë së Jugut rritën edhe më tej sanksiont. Veriu mbylli kompleksin industrial të Kaesongut, e vetmja pikë lidhjeje mes dy vendeve dhe kërcënoi me zhdukje si SHBA ashtu edhe Jugun.

Top Channel