“BB6”, për herë të fundit ballë për ballë

Sa kanë qenë vetvetja dhe sa kanë aktruar brenda shtëpisë për të marrë çmimin e madh? Cilat kanë qenë lidhje të vërteta dhe cilat jo. Shumë gjëra janë sqaruar gjatë spektaklit të së dielës mbrëma.

Elona u shpreh për lidhjen në shtëpi të Anaidit dhe Joanës: “Janë njerëzit më hipokritë në lidhje me njëri-tjetrin. Dashuria e tyre ka qenë vetëm poshtë çarçafit.”

E menjëhershme replika e Joanës: “Unë në atë shtëpi nuk kam bërë asgjë më tepër se çfarë bëni ju jashtë shtëpisë.”

Mbrëmjen e së dielës u sqarua edhe marrëdhënia e Shpendit me Eldorën. “Ishte i vetmi person i besueshëm për mua. Më pëlqen karakteri dhe guximi i saj. Këto ditë që jam në Tiranë kam ndenjur vetëm me Eldorën”, tha Shpendi.

Dy protagonistët e këtij edicioni kanë qenë padyshim Anaidi dhe Joana. Dy konkurrentët kanë krijuar edhe një marrëdhënie të veçantë në Big Brother. Një lidhje  e cila mori fund me deklaratën e Anaidit gjatë emisionit Fun Club, ku u shpreh se ishte “single”.  

“U ndava nga Joana sepse do martohesha me të dhe do na shoqëronte në altar Jani”, tha Anaidi kur u pyet pse u nda menjëherë pas daljes nga shtëpia.

Anaidi u shpall fitues i Big Brother 6. Po cila ka qenë loja e tij, e cila e solli deri këtu?

“Jeta ime jashtë shtëpisë nuk është si brenda. Unë në shtëpi kam qenë lojtar dhe kam bërë show”, tha Anaidi.

Ka përfunduar kështu edhe një edicion i suksesshëm i këtij “reality show”, i cili e ka mbajtur publikun të ngulitur pas ekranit të televizorit për mbi 100 ditë.

Për të gjithë ata që janë të interesuar të marrin pjesë në edicionet e ardhshme, audicionet do të fillojnë së shpejti.

Top Channel