Të ardhurat në buxhet, Qeveria: Do të rriten

“Ne kemi parashikuar një rritje nominale prej 5.1 për qind për vitin 2013, rritje që në fakt është thuajse në linjë me atë çfarë institucione prestigjioze si FMN-ja, për shembull, ka parashikuar”, tha zëvendësministri i Financave, Alfred Rrushaj.

Opozita mendon se buxheti 2013, përveçse konfirmon krizën është jorealist. Deputetët socialistë bazohen tek dështimi sipas tyre, me buxhetin e këtij viti.
 
“Faktikisht viti 2012 paraqet një mosrealizim serioz, 24 miliardë afërsisht nga parashikimi. Duhet ta themi që 24 miliardëshi i parealizuar influencon edhe planifikimet e vitit 2013, i cili është gjithashtu i pasigurt, por në këndvështrimin tim personal tim është i pamundur”, tha deputeti socialist Arben Ahmetaj.

“Në tremujorin e parë të vitit, gjysma, treçereku i Shqipërisë ishin nën borë dhe nën shi, një pjesë e aktivitetit tregtar u pezullua, gjë që u shoqërua me rënie të fluksit të të ardhurave. Ju e dini që ekonomia jonë është e lidhur me atë italiane për shembull. Mospasja e ritmeve pozitive që ishin parashikuar në fillim të vitit për italianët, natyrisht do të ishte impakt edhe tek të ardhurat”, tha zwvendwsministri Rrushaj.

Deputeti socialist Erjon Braçe nënvizoi se treguesi i të ardhurave që mbledh Qeveria nga taksat po përkeqësohet nga viti në vit.

Në vitin 2013 Qeveria parashikon të mbledhë 360.7 miliardë lekë të ardhura në buxhet ose 25.2% e Prodhimit Kombëtar.

Top Channel