Pajisjet e Poliçanit për skrap

Në pamje duket qartë se kamionët që dalin nga kombinati i Poliçanit nuk ishin të ngarkuar vetëm me skrapin e predhave të demontuara, por me hekur të nxjerrë nga magazinat dhe ndërtesat e shkatërruara.

Prej ditësh ka nisur heqja nga repartet e këtij kombinati të tornove dhe frezave, për t’i shitur më pas për skrap. Gazetarët kanë mundur të futen në Kombinat, pasi kanë siguruar një fletëhyrje të lëshuar nga ana e drejtorit, i cili është vënë në dijeni se gazetari i prezantuar si tregtar donte të blinte një torno e një frezë.

Edhe pse është një institucion i sigurisë së veçantë, në këtë kombinat mund të hyjë kushdo lirshëm, nëse kërkon që të blejë tornot apo presat disa tonëshe.

Të shoqëruar nga kryeinxhinieri dhe inxhinierët e kombinatit të Poliçanit, gazetarët e “Fiks Fare” kanë hyrë në magazinat ku qëndronin të grumbulluara pajisjet, të cilat presin që të shiten për skrap. Gjatë bisedave, që gazetari i prezantuar si tregtar ka zhvilluar me dy inxhinierët e kombinatit të Poliçanit, mësoi se tornot e mbledhura për skrap në magazinë janë të pakonsumuara dhe mund të vihen në punë.

Përpara shitjes, këto torno kalojnë për riparim në repartin e mekanikëve dhe vetëm më pas mund t’i blesh, duke të llogaritur në çmim edhe shërbimin e riparimit. Një kg varjon nga 100 deri 120 lekë të reja.

Nëse kërkon skrap me shumicë, të shesin edhe tornot që janë në punë. Gazetarëve të “Fiks Fare”, punonjësit e kombinatit mekanik të Poliçanit u kanë sugjeruar që të prenotojnë për të blere një torno, në të cilën aktualisht punohet, por që shumë shpejt do e nxjerrin në shitje.

Top Channel