Daçiç: Politikanët shqiptarë të heshtin

Ai ka thënë se përgjigjia me forcë e xhandarmërisë serbe ndaj shqiptarëve, që sipas tij kanë sulmuar policët, ka qenë adekuate pasi askush nuk guxon të çoj dorë ndaj njësive speciale.

Daçiç ka udhëtuar vet për në Vranje për të folur për çështjen në një konferencë të jashtëzakonshme, pas arrestimit të tetë shqiptarëve. Ai ka thënë se amnistia që u është garantuar me marrëveshje ndërkombëtare nuk vlen për krime.

“Kur është fjala për amnistinë e miratuar nga Vojisllav Koshtunica dhe institucionet federative të asaj kohe, do të doja t’ua rikujtoj, ndonëse nuk dua ta komentoj politikisht pasi mendoj se jemi shteti i vetëm që kemi amnistuar terroristët, ajo nuk përfshin veprën penale për krime ndaj njerëzimit, përkatësisht krime lufte”, ka deklaruar Daçiç.

Policia serbe ka bastisur tetë lokacione dhe ka arrestuar tetë persona, pesë për krime lufte, ndërsa tre të tjerë për sulme ndaj policëve dhe armëmbajtje pa leje.

Për krime lufte janë arrestuar Elhami Salihi, Mustafa Limani, Sherif Abdyli, Nedir Sefedini dhe Sevdai Emrullahi. Abdyli është përkthyes i OSBE-së në Serbi.

Ndërsa në grupin e tre personave të tjerë ndodhet edhe Izet Qazimi, vëllai i Ridvan Qazimit, të njohur si komandant Lleshi që kishte udhëhequr Ushtrinë Çlirimtare të Preshevës, Medvegjës dhe Bujanocit në konfliktin e armatosur të vitit 2001.

Ata akuzohen për disa sulme, vrasje dhe mbajtje të serbëve në burgje në Terrnac dhe fshatrat përreth Bujanocit, ku edhe kanë ndodhur bastisjet. Të arrestuarit janë dërguar në polici në Beograd, ndërsa kanë reaguar edhe shqiptarët.

“Këto janë akuza politike dhe koha kur kanë gjetur të bëjnë arrestimet tregon se ato kanë motive politike”, ka deklaruar Shaip Kamberi, kryetar i komunës së Bujanocit.

Ndërsa deputeti Riza Halimi ka thënë se ky është një terror dhe se pikët politike fitohen duke luajtur me fatin e këtij vendi dhe rajonit.

Prishtina: Arrestimet cënojnë paqen dhe stabilitetin

Qeveria e Republikës së Kosovës dënon “aktin e ulët” të arrestimit të qytetarëve shqiptarë në Komunën e Bujanocit. Prishtina zyrtare vlerëson se këto veprime të vazhdueshme të qeverisë së Serbisë janë një provokim i rëndë kundër paqes dhe stabilitetit në rajon.

“Qytetarët shqiptarë në rajonin e Preshevës, Bujanocit dhe Medvegjës kanë qenë dhe vazhdojnë të mbeten të dhunuar nga presionet e vazhdueshme të Beogradit zyrtar, përmes proçeseve të montuara politike, që kanë për qëllim dëbimin e qytetarëve shqiptarë nga trojet e tyre dhe krijimin e pasigurisë së përgjithshme në ato territore të banuara me shqiptarë”, thuhet në një deklaratë për shtyp.

Qeveria e Kosovës thekson se, këto veprime tensionuese në prag të zgjedhjeve në Serbi janë edhe një dëshmi e qartë se qeveria e Serbisë po vazhdon me qasjen e saj anti-europiane, që është në dëm të krijimit të një rajoni të sigurtë, të qetë dhe mbi të gjitha në dëm të bashkëpunimit rajonal. 

Top Channel