Irak, Al Kaeda pas masakrave

Organizata terroriste deklaron se bëhet fjalë për një fushatë kontrasti ndaj planeve hegjemonike të Iranit shiit, bën të ditur Site, qendra amerikane për mbikëqyrjen e faqeve islamike të internetit.

“Shteti Islamik në Irak e di ku dhe kur duhet të godasë dhe muxhaheidinët nuk do të qendrojnë duarkryq teksa projekti i rrezikshëm iranian po bëhet gati për të treguar fytyrën e tij të shëmtuar”, thuhet në deklaratë.

Më 22 dhjetor një seri sulmesh të koordinuara me bombë tronditën kryeqytetin e Irakut, Bagdad, duke vrarë të paktën 68 persona dhe duke plagosur mbi 185 të tjerë.

Autoritete nga Ministria e Brendshme irakene deklaruan se gjithësej u sulmuan 13 lokacione, përfshirë Al Amilin, në jug të kryeqytetit, dhe Halauin e Karradën, në afërsi të qendrës.

Atentatet e së enjtes ishin më të rëndat që regjistroheshin ndër muaj në Irak dhe ndodhën në një moment frike për rritjen e tensioneve sektare dhe për një shpërbërjen e qeverisë së unitetit.

Shpërthimi i bombave mbetet në rend të ditës në Irak, edhe pse dhuna sipas autoriteteve ushtarake amerikane ka rënë ndjeshëm që pas vitit 2006, kur dhe arriti pikun.

Ish-zëvendëspresidenti i Irakut, Tariq al-Hashemi, cilësoi kryeministrin Nouri al Maliki si fajtor për shpërthimin e papritur të dhunës në vend.

Hashemi, ndaj të cilit është vendosur një mandat-arresti për akuzën e bashkëpunimit me grupe terroriste, u shpreh se “Maliki duhet të përqendrohet tek rikthimi i stabilitetit në vend dhe jo tek gjuetia ndaj politikanëve patriotë”.

Top Channel