Rusi, ndalohet vëzhguesja e pavarur
03/12/2011 00:00
Bimët e rralla të kapura nga doganat franceze, i dhurohen kopshtit botanik të Parisit (fotot)
02/05 19:14
Liderja e grupit të vetëm të pavarur për monitorimin e zgjedhjeve në
Rusi është ndaluar për disa orë nga policia, një lëvizje që ajo e ka
cilësuar si presion të qeverisë ndaj grupit përpara zgjedhjeve
parlamentare të së dielës.
Liderja e Golos, Lilya Shibanova u ndalua në aeroportin kryesor të Moskës pasi refuzoi të dorëzonte për kontroll kompjuterin e saj laptop. Të premten grupi në fjalë u gjobit për shkelje të ligjit elektoral.
Deputetët rusë kanë shtruar pyetjen përse Golos, një organizatë e financuar nga jashtë, lejohet të monitorojë zgjedhjet ruse.
Golos, që do të thotë “zë” ose “voto”, është një grup i respektuar përsa i përket mbikëqyrjes së proceseve zgjedhore dhe është themeluar nga BE dhe SHBA.
Ai siguron trajnime për vëzhguesit dhe menaxhon një faqe interneti ku mblidhen ankesat për abuzime gjatë procesit elektoral.
Të premten, organizata kishte regjistruar mbi 5 mijë ankesa në lidhje me zgjedhjet e së dielës, shumë prej të cilave kishin të bënin me partinë në pushtet, Rusia e Bashkuar, e drejtuar nga kryeministri Vladimir Putin.
Shibanova, duke folur për një stacion radiofonik rus ditën e premte tha: “Ne lamë avionin dhe vazhduam për kontrollin e pasaportave pa pasur probleme. Më pas, ata kërkuan sendet e mia personale dhe tani po përpiqen të më marrin kompjuterin, gjoja për një kontroll”.
Ajo u lirua vetëm pasi u dorëzoi autoriteteve laptop-in e saj. E pyetur nëse ndalimi ishte një përpjekje për të bërë presion mbi grupin, ajo tha: “Sigurisht. Kjo është një lojë tjetër”.
Top Channel
