Promemorie për trashëgiminë

“Nëse kushdo kandidat do na merrte ne telefon dhe do kërkonte një mendim ne do ja jepnim. Të mundohemi t’ua imponojmë edhe këtë nevojë”, është shprehur Artan Lame, kryetar i Shoqatës për Mbrojtjen e Trashëgimisë Kulturore.

“Është pushtimi i tokës së bukës. Në tërë botën toka pastrohet nga gurët. Tek ne marrin gurë dhe ia hedhin tokës që të bëjmë shtëpi”, tha arkitekti Maks Velo.

Përfaqësuesit e këtij takimi kanë kërkuar që kjo fushatë vendore të jetë me programe konkrete për qytetarët të cilët kërkojnë më shumë hapësira publike, më shumë parqe dhe më shumë qendra kulturore.

“Shteti hyn si partner në fitim. Pjestarët e tij apo vetë shtetit kur nxjerrin një vendim që heq nga zonat e mbrojtura pyje dhe hektarë të tërë si në karaburun dhe ja jep një kompanie private”, pohoi ambientalisti Xhemal Mato.

Përfaqësuesit e shoqërisë civile janë shprehur të gatshëm të denoncojnë çdo kandidat që nuk i përmbahet programit të tij, pavarësisht se kujt partie i takon.

“Duhet të kemi kurajon që të vemi në fshatin x ku kalaja apo ndonjë monument tjetër është e shkatërruar dhe të bëjmë fushatë kundër atij kryetari. Duhet të studiojmë programet dhe të dalim hapur dhe mbështesim dikë që ka në program rikostruksionin e objekteve të trashëgimisë kulturore”, theksoi gazetari Mentor Kikia.

Deri më sot të paktën 50 monumente kulture janë shkatërruar dhe hequr nga memoria historike dhe kulturore e Shqipërisë, një nismë shkatërrimi që nuk po ndalet edhe sot.

Piramida është një ndër objektet që u hoq se fundmi nga lista e trashëgimisë kulturore dhe për të cilën qeveria ka dhënë veton e shkatërrimit.

Top Channel