Dëbora bllokon akset nacionale

Burimet zyrtare bëjnë të ditur se këta akse nacionale janë të kalueshëm vetëm me zinxhirë.

Mësohet se gjatë orëve të natës reshjet intensive të dëborës kanë bllokuar tërësisht Qafë-Krrabën, ku disa automjete janë bllokuar për disa orë.

Probleme më serioze paraqiten në rrugët rurale, kryesisht në zonën e Librazhdit, ku trashësia e dëborës i ka kaluar 40 cm duke izoluar kështu disa fshatra.

Reshjet në qytetin e Korcës kanë qenë më të lehta dhe raportohet e bllokuar vetëm Dardha. Ndërkohë, më e rënduar është situata në Kukës, ku në disa zona trashësia e dëborës ka shkuar në mbi një metër.

Për shkak të gjendjes së krijuar është mbledhur shtabi i emergjencës. Shtabi ka diskutuar për situatën e krijuar nga bllokimi i shumë komunave që ndodhen në këtë gjendje prej 3 ditësh. Shumë shkolla janë mbyllur, ndërsa rrugët nacionale paraqesin shumë vështirësi në lëvizje.

Numri i vogël i borëpastrueseve e bën të pamundur përballimin e situatës. Edhe në qarkun e Dibrës ka mjaft probleme.

Trashësia e dëborës ka arritur në 80 centimetra në 24 orët e fundit. Në akset nacionale kalimi bëhet me vështirësi me zinxhirë dhe me një kalim.

Top Channel