Berisha: Tryezë për reformën zgjedhore

Deri më sot, cështja e reformës elektorale është trajtuar, historikisht, nga një komision bipartizan parlamentar, por, sipas kryeministrit Berisha, tryeza është e domosdoshme në kushtet kur Partia Socialiste nuk ka pranuar ofertën e Partisë Demokratike, në muajin shtator.

Sipas kësaj oferte, demokratët propozonin hetim parlamentar të zgjedhjeve ose, duke zbatuar nenin 178, pika 6 e Kodit Zgjedhor, që do të thotë marrje e materialeve zgjedhore nga arkiva e shtetit dhe djegie e fletëve të votimit, ose që komisioni hetimor për zgjedhjet e kaluara të niste punen me 10 cështjet e tjera të kërkuara për hetim nga Partia Socialiste, ndërsa kutitë me materialet zgjedhore të shqyrtoheshin pasi të vinte një opinion nga Komisioni i Venecias për fletët e votimit.

Kryeministri Berisha kujtoi se në propozimet e demokratëve bën pjesë edhe oferta për të votuar cdo amendament të socialistëve për Kodin Elektoral, pasi ato të kenë kaluar ekspertizën e OSBE/ODIHR-it apo të Komisionit të Venecias.

“Kjo ofertë, më e gjera, më maksimalja, ka gjetur refuzimin konstant të PS. Atëherë ne do të thërrasim tryezën e forcave politike dhe të fillojmë nga puna, me vullnetin që nga fundi i këtij sesioni ato rekomandime të mund të votohen”, ka deklaruar Berisha.

Meqë ndryshimet në Kodin Zgjedhor kërkojnë 84 vota dhe duke ndjekur traditën e miratimit të kësaj reforme me konsensusin e dy partive të mëdha, kryeministri Berisha kërkoi bashkëpunimin e kreut të opozitës Edi Rama.

“Uroj dhe dëshiroj që zoti Rama të mos e pengojë grupin e vet të marrë pjesë në këtë proces, sepse refuzimi i tij do të duket sikur të jep dicka në dore, por të kthehet kundër. Do të jenë të shumtë ata që do të thonë se reforma në Shqipëri u pengua për qëllime jodemokratike”, ka pohuar Berisha.

Tre jave më parë komisioneri për Zgjerimin, Shtefan Fyle, nëpërmjet një letre, i kërkoi kryeministrit Berisha të kontribuonte në zgjidhjen e situatës politike në Shqipëri, në mënyrë që duke garantuar transparencën për zgjedhjet dhe duke respektuar Kushtetutën, të mund të arrihej në bërjen e reformës elektorale në mënyrë që zgjedhjet lokale të zhvillohen sipas standarteve më të larta demokratike.

Mungesa e konsensusit politik për reformat kryesore të vendit mund të jetë një nga arsyet që më 9 nëntor, Komisioni Europian të japë opinion negativ për marrjen nga Shqipëria të statusit të vendit kandidat, gjë të cilën kryeministri Berisha e la të kuptohej fare tërthorazi.

“Gjykoj se nuk duhet të udhëhiqemi nga asgjë tjetër përvec detyrimeve që kemi përpara shqiptarëve në rrugëtimin tonë drejt Europës”, ka shtuar kryeministri.

Top Channel