Baku, “countdown” i Lojërave të Solidaritetit Islamik

Delegacioni shqiptar është akomoduar këtë të enjte në fshatin olimpik në kryeqendrën azere, së bashku me 55 shtetet e tjera pjesëmarrëse në këtë edicion të katërt të këtyre lojërave.

Rreziku potencial i akteve terroriste, e gjithashtu plani organizativ i autoriteteve të sigurisë në Azerbajxhan, ka nxjerrë në rrugë dhe sheshe plot 5.000 forca policie të angazhuara për mbarëvajtjen e lojërave.

Ceremonia do të zhvillohet të premten në 21:00, me orën lokale, dhe 65 televizione do të jenë në transmetim të drejtpërdrejtë në të gjithë globin.

Delegacioni kuqezi do të jetë protagonist me 5 sportistë në Lojërat e 4-ta të Solidaritetit Islamik. Relaksa Dauti, Arta Merturi, Spajdi Selamaj, Deni Baholli dhe Elord Gjana do të synojnë podiumin për të ngritur lart flamurin shqiptar, edhe pse konkurrenca e superfuqive sportive si Turqia, Irani apo Arabia Saudite është e madhe.

Lojërat Islamike u mbajtën për herë të parë në Arabi në vitin 2005, e më pas kaluan në Indonezi. Edicioni i tretë i parashikuar në Iran, në fillim u spostua, e më pas u anulua. Tani do të jetë radha e Azerbajxhanit për të synuar të lërë mbresa në aktivitetin me 56 shtete.

Top Channel