Chapecoense, drejtori i klubit: Do ta rindërtojmë ekipin, edhe më të fortë

Aeroplani me të cilin po udhëtonte ekipi brazilian u rrëzua në Medelin të Kolumbisë, ndërsa autoritetet kanë nxjerrë tashmë si konkluzion se ngjarja mund të ketë ardhur si pasojë e mungesës së karburantit.

19 lojtarë dhe stafi drejtues ishin mes 71 personave që humbën jetën, ndërkohë që 3 lojtarë të ekipit gjenden mes të mbijetuarve fatlumë të atij aksidenti tragjik.

Ekipi brazilian do të duhet të zhvillojë edhe ndeshjen e fundit të kampionatit më 11 dhjetor. Presidenti në detyrë i Chapecoenses, Ivan Tozzo tha se klubi shpreson që ta luajë përballjen me Atletico Mineiro duke përdorur ata që kanë mbetur nga ekipi i parë dhe duke shfrytëzuar lojtarë të akademisë, edhe pse presidenti i Mineiros Daniel Nepomuceno tha më vonë, gjatë një konference për shtyp, se klubi i tij nuk dëshiron të dërgojë skuadrën për të zhvilluar ndeshjen, por do të dëshironte që fitorja t’i akordohej kundërshtarëve për shkak të fatkeqësisë.

Chapecoense ishte duke udhëtuar drejt Medelinit për t’u përballur me Atletico Nacionalin e Medelinit në finalen e Kupës së Amerikës së Jugut (Copa Sudamericana) mbrëmjen e së mërkurës, ndeshje e cila do të ishte më e rëndësishmja në historinë e tyre.

“Në kujtim të atyre që humbën jetët dhe për të nderuar familjet e tyre, ne do ta rindërtojmë këtë klub nga e para. Madje do të jetë edhe më i fortë”, tha drejtori i klubit, Cecilio Hans.

Chapecoense militontë në kategorinë e katërt braziliane në vitin 2009, por vitin e fundit ishin kthyer në një skuadër e kategorisë së parë dhe po shkëlqenin me lojën e tyre, përpara se të siguronin edhe kualifikimin historik për në finalen e kompeticionit të dytë për nga rëndësia në Amerikën e Jugut, ekuivalenti i Europa League.

Tre prej klubeve më të shquara të Brazilit kanë bërë të ditur se do të ofrojnë lojtarë hua për Chapecoensen. Sao Paulo, me 6 tituj kombëtarë, tha gjithashtu se Chapecoense duhet të mos lejohet të bjerë nga kategoria e parë braziliane për të paktën 3 sezonet e ardhshme, për shkak se do t’i duhet kohë të rindërtojnë ekipin.

Mes të mbijetuarve, mbrojtësit Alan Ruschel dhe Neto mbeten në gjendje kritike por të qëndrueshme siç njoftojnë mjekët, teksa Alan i është nënshtruar një ndërhyrjeje kirurgjikale në shpinë. Portieri Jakson Ragnar Follmann është dashur të presë njërën këmbë, ndërkohë që i rrezikohet edhe tjetra. Ndërkaq, plot 9 lojtarë nuk udhëtuan me ekipin në atë udhëtim fatkeq. Prej këtyre, portieri rezervë Marcelo Boeck tha se, së bashku me lojtarë të tjerë kishin menduar të largoheshin nga klubi vitin e ardhshëm, por tashmë do ta rimendojnë vendimin e tyre.

“E dimë se ky është një moment i veçantë që askush nuk e priste. Jemi gjithsesi pjesë e tij dhe shpresojmë që të mund të kontribuojmë në rindërtimin e ekipit, në kujtim të viktimave”.

Top Channel