Pa provime, në Universitet do të hyhet me…ADN

29/11/2016 00:00

Gjurmët e suksesit tonë në jetë përveç vullnetit, e ndoshta edhe fatit, fshihen më së shumti tek ADN-ja jonë. Sipas një grupi studiuesish, ky zinxhir bart suksesin dhe prirjet në jetët tona.

E në këtë prizëm studiues të Universitetit të Suseksit në Britaninë e Madhe kanë përqendruar punën e tyre në studimin e gjenetikës për të kuptuar sesi ndikon ajo në edukimin tonë. Këtë fushë studimore ata e kanë quajtur “genomet edukative”.

Në një artikull të publikuar në “The Conversation”, lektorja Darya Gyasina thotë se në një të ardhme jo fort të largët, provimet universitare mund të zhduken dhe të zëvendësohen me analizimin e ADN-së së një personi për të përcaktuar fushën ku ai është i prirur dhe ka më shumë mundësi që të ketë sukses.

Këtij pohimi i vjen në ndihmë edhe një studim masiv i muajit maj i Universitetit të Kalifornisë së Jugut, ku u analizuan të dhënat gjenetike të 300 mijë personave dhe u gjetën një numër i madh genesh që kishin të bënin me edukimin.

Studimi arriti në përfundimin se janë mbi 74 gene që kanë lidhje të drejtpërdrejtë me suksesin në arsimim dhe disa kombinime të tyre që lidhen me një sukses akoma më të madh. Gjithsesi, autorët e këtij studimi theksojnë se lidhja mes llojit të genomit dhe suksesit në arsimim në jetë është modeste, rreth 0.43 përqind e kontributit total të ADN-së.

Top Channel