Vokshi: Brukseli të ndërhyjë, droga po kërcënon Shqipërinë

Vokshi deklaroi se Partia Demokratike dhe LDGSH kanë nisur takimet me qytetarët për të denoncuar lidhjet e qeverisë me krimin dhe për të mos lejuar pushtimin e Shqipërisë nga trafikantët e drogës dhe mafia e plehrave. Ajo kërkoi ndihmën e Forumit të Grave Popullore Europiane për të lobuar me kancelaritë perëndimore për ta nxjerrë Shqipërinë nga kjo situatë kritike që rrezikon edhe procesin e integrimit ne BE.

Ajo gjithashtu shprehu shqetësimin për rritjen e numrit të vrasjeve për shkak të konflikteve për parcelat e drogës si dhe rritjen e përdorimit nga ana e fëmijëve e të rinjve.

“Trafikantët po shfrytëzojnë të rinjtë dhe familjet e varfra për të mbjellë kanabis duke sjellë edhe rënien e sektorëve të tjerë prodhues të ekonomisë. Ndërsa në raportet sekrete ka të dhëna se ryshfeti për drogën shkon deri në qeveri. Edhe në mediat më prestigjioze po shkruhet se qeveria e Tiranës po e përdor drogën për të mbajtur pushtetin”, tha Vokshi në takimin e europarlamentareve dhe përfaqësueseseve të qeverive të djathta europiane.

Gjatë fjalës së saj, Vokshi theksoi shqetësimin për thellimin e varfërisë te gratë dhe të rinjtë. Duke iu referuar raporteve të Bankës Botërore, gjysma e popullsisë jeton në minimimin jetik, me më pak se 500 lekë në ditë, pasi korrupsioni është i përhapur në cdo qelizë të qeverisjes.

“Shqiptarët kanë frikë të flasin nga varfëria dhe po shfrytëzohen për punë të rënda dhe të paligjshme bashkë me fëmijët e tyre dhe gratë e pambrojtura. Papunësia është rritur ndjeshëm tek gratë, në rajone të caktuara edhe 50 – 70%; politikat qeveritare i mbyllën dyert e universiteteve mijëra vajzave që investuan për 12 vjet për t’u arsimuar. Pa punë, pa akses në arsim e shëndetësi, pa shpresë, e vetmja mundësi për shum gra dhe vajza mbetet azilimi”, përfundoi Vokshi.

Top Channel