Kandidati për kryebashkiak i Dibrës, Sherefedin Shehu u takua me banorë të Peshkopisë, Sohodollit dhe Maqellarës, të cilat do të kthehen në tri qendra urbane të Dibrës, sipas kandidatit demokrat.
“Për Sohodollin, që është një qendër e madhe e Dibrës së Vogël, po të themi dhe për Maqellarën, që është një qendër e madhe e Dibrës së Madhe, unë kam një projekt të veçantë. Maqellara dhe Sohodolli do të bëhen dy qendrat urbane të Bashkisë Dibër”, u shpreh Shehu.
Projektet janë gati për sistemimin dhe asfaltimin e rrugëve që lidhin fshatrat me qendrat, por qeveria nuk i ka dhënë asnjë lek për Dibrën, theksoi kandidati Sherefedin Shehu.
“600 milionë euro në vit është buxheti për investime i Shqipërisë. Në Dibër nuk keni parë asnjë euro, përveç bulevardit dhe ai projekt është i barabartë me 40 rrugë Majtare. Gjysma e lekëve atje nuk investohen, gjysma e lekëve atje shkojnë për të vjedhur vota”, tha Shehu.
Duke vlerësuar kontributin e Shehut për Rrugën e Arbrit, deputeti i PD-së Flamur Noka tha se Rama e bllokoi investimin sepse kërkonte ryshfet nga firma kineze. Kjo rrugë u nis nga Partia Demokratike dhe do të ndërtohet nga Partia Demokratike: “Pse e bllokoi Rrugën e Arbrit? E nisi PD-ja, në të gjitha hapat e atij procesi ky burrë ka kontribut madhor. E bllokuan. Po pse e bllokuan, megjithëse ishte mbyllur përfundimisht negociata me firmën kineze? Sepse i kërkojnë ryshfetin edhe firmave të huaja këta, përqindjen. Rruga ka ngelur pezull dhe nuk bëhet dhe nuk bëhet derisa të vijë Partia Demokratike në pushtet”.
Top Channel
