Nisë, masakra që nuk kurseu askënd; fëmijë e të rritur, banorë e turistë

Fatima Charrihi ishte e para që vdiq sipas djalit të saj. Gjithë çfarë mund t’iu them në këtë moment për nënë time, u shpreh ai, është se mbante perçe e praktikonte Islamin, atë të vërtetin ama, jo versionin terrorist.

Një prej personave të tjerë të vrarë aq mizorisht është zëvendës shefi i policisë kufitare të Nisës, Jean-Marc Leclerc. Tre shtetas gjermanë janë në mesin e të zhdukurve, sipas zyrtarëve në Berlin.

Raporte të pakonfirmuara flasin për tre klasa nga një shkollë e kryeqytetit gjerman, të cilat ishin në ekskursion në këtë qytet, e rreshtojnë mes të vdekurve një mësues dhe dy fëmijë.

I vrarë në vend ka mbetur dhe 60-vjeçari Robert Marchand. Nuk kanë mundur të dalin gjallë nga sulmi vrastar as turisti amerikan, Sean Copeland, 51 vjeç dhe djali i tij 11 vjeçar, Brodie. Se çfarë përjetuan në ato momente njerëzit e mbledhur në shëtitoren buzë detit, e tregon qartë dëshmia e këtij të mbijetuari.

“Kishte gjithandej njerëz të shtrirë në tokë, vendi ishte i mbushur me të vdekur. U përpoqa të mos shikoj, u përpoqa t’i mbaj sytë lart sepse nuk doja të shihja, ishte tepër, tepër e dhimbshme”, u shpreh Karim Laamara.

U bënë disa goditje brenda vitit në Francë që paralizojnë ndjenjën e sigurisë. Si do t’ia bëjmë për të mos e lënë ankthin të pushtojë përditshmërinë tonë, pyet Le Figaro në njërin prej artikujve të tij kushtuar tragjedisë së Nisës, si do ta kapërcejmë friken e daljes në rrugë dhe vazhdimit të jetës si normalisht.

Top Channel