F1, Hamilton në krizë, mbrojtja e titullit tani “mirazh”

Piloti britanik, grinta e të cilit ka prevaluar ndaj shokut të skuadrës Nico Rosberg në vitet e fundit, tani gjendet në vështirës dhe ka humbur terren në renditje ndaj gjermanit.

Problemet e besueshmërisë në dy garat e fundit, por gjithashtu starti i dobët në pistën e Melbërnit, do të jenë fokusi në takimin me kokat e skuadrës së Mercedes. Niko Rosberg ka fituar 3 garat e para sezonale të Formula 1 dhe ka krijuar një distancë prej 36 pikësh me Hamilton, diçka të cilën piloti me ngjyrë nuk e kishte parashikuar në skenarin më të keq.

Toto Wolff dhe Paddy Lowe vendosin thuajse gjithçka në bokset e Mercedes, dhe pikërisht ndaj tyre në zyrat qendrore në Brekli, piloti britanik do të ushtrojë presion për përgjigje.

Ka një shkallë të konsiderueshme fati të keq për Hamilton, por ky i fundit është ankuar se makina është përshtatur më shumë me stilin e drejtimit të Rosberg.

Drejtuesit sipas mediave do të sigurojnë 3 herë kampionin e botës se titulli është plotësisht i arritshëm, pasi duhen ende 18 gara për t’u zhvilluar deri në finishin e sezonit spektakolar të Formula 1. Ndalesa e radhës e kampionatit do të jetë në 1 maj në Rusi, ndërsa gara e fundit në 27 nëntor në Abu Dabi.

Top Channel