Greqi, bisedimet për ndihmën zhvillohen të hënën. Athina, letër FMN-së për hua

Një letër u është dërguar përfaqësuesve të këtij fondi nga Ministria greke e Financave, përpara bisedimeve të shtyra për të hënën mes Athinës dhe huadhënësve kryesorë të saj.

“Do të diskutojmë me autoritetet greke dhe me partnerët tanë europianë kohështrirjen dhe modalitetet e nevojshme për diskutimet”, bëri të ditur FMN përmes një deklarate.

Dy masat reformuese të konsideruara si parakushte për fillimin e negociatave, tashmë janë miratuar edhe nga Parlamenti grek. Në bisedime do të jenë përfaqësues nga Komisioni Europian, Banka Qendrore Europiane dhe Fondi Monetar Ndërkombëtar.

Kryeministri grek, Alexis Tsipras pranoi kushtet e reja duke thënë se, pavarësisht se ishte kundër tyre, ato janë të domosdoshme për mbijetesën e Greqisë.

Shumë grekë e kanë lavdëruar Alexis Tsiprasin për qëndrimin e tij, ndërsa shumë të tjerë janë të irrituar tashmë. Brenda partisë së tij në qeveri, Tsiprasit i është dashur të përjashtojë disa anëtarë që kundërshtonin “kthesën 180 gradë” të pozicionit të mbajtur fillimisht nga qeveria greke.

Ish-ministri grek i Financave, Yanis Varoufakis, u largua gjithashtu nga posti qeveritar dhe është sulmuar madje për planin e reformave. E megjithatë, Tsiprasit do t’i duhet ende të përballet me një rebelim brenda partisë së tij të ekstremit të majtë, Syriza, e cila erdhi në pushtet me premtimet për t’iu dhënë fund masave shtrënguese.

Për të siguruar masat e fundit të miratuara në Parlament, kryeministrit iu desh të mbështetej në votat e ardhura prej partive të opozitës, por nuk është e qartë se për sa kohë do të zgjasë një mbështetje e tillë. Shumë banorë janë të shqetësuar se njerëzit nuk do të mund të durojnë më me masa të tjera shtrënguese, të cilat do të bëheshin të papërballueshme.

Bisedimet për ndihmën e tretë prej 86 miliardë eurosh priteshin të nisnin në Greqi ditën e premte, por u shtynë për shkak të shqetësimeve se duhej zgjedhur një vend tepër i sigurt në Athinë. Nga sa u kuptua, zyrtarë të BE-së dhe FMN-së janë të shqetësuar nga paniku dhe irritimi i popullit grek kundrejt tyre, për shkak të masave shtrënguese, ndaj dhe kërkojnë të sigurohen për një vend të përshtatshëm për zhvillimin e bisedimeve.

Kriza greke kapi kulmin kur Greqia nuk përmbushi shlyerjen e një kësti borxh ndaj FMN-së brenda qershorit, për arsye bankat u mbyllën për 3 javë duke kufizuar tërheqjet nga bankomatet (ATM).

Një prej çështjeve kryesore që duhet ende të zgjidhet mes huadhënësve është fakti nëse është i mundshëm apo jo një lehtësim i borxhit grek. Deri më tani, huadhënësit e kryesuar nga Gjermania kanë këmbëngulur për rritje taksash, shkurtime shpenzimesh dhe reforma të tjera financiare.

Athina shpreson të ketë një marrëveshje të re ndihme përpara 20 gushtit, në mënyrë që të miratohet në Parlamentin helen përpara pushimeve.

Top Channel