Top Story/ Ku shkuan 1.1 milionë euro tendera për trajnimin e qenve?!

07/01/2020 21:17

Top Story ka analizuar disa nga shkeljet që bëhen në një proces tenderimi. Ne synojmë të hedhim më shumë dritë për qytetarët, mbi këtë proces të panjohur të ekonomisë.

Për të qenë më të kuptueshëm, do të zbërthejmë dhe analizojmë me detaje disa nga shkeljet më të shpeshta, që bëhen në tenderim e si rezultat ndikojnë direkt në përkeqësimin e buxhetit të shtetit.

“Shkeljet me flagrante janë kur shohim që e njëjta punë publike brenda nje harku kohorë pakë vjeçarë ripërsëritet ç’ka do të thotë që tenderi të paktën në njërin nga rastet ka qenë fiktiv”, tregon Aranita Brahja, Drejtuese e Open Data Albania

Si fillim duhet të theksojmë se procesi i tenderimit i kryer me standard dhe në mënyrë korrekte ka si qëllim përdorimin e parave në mënyrë sa më eficente. Referuar viteve të fundit nuk është mundur që të kursehen parat publike nga ky proces. Madje sipas një raporti të auditimit të gjykatës europiane në Shqipëri rezulton se një në tre tendera është dhënë pa garë të ndershme.

“Ky është një tregues shumë negativ dhe një përqasje shumë negative që na e bëjnë organizmat ndërkombëtare dhe që në fakt përkthehet si një humbje besimi të investitorëve të huaj ndaj ekonomisë shqiptare”, tregon Prof. Dr Sezana Guxholli, Eksperte Ekonomie

Të vjedhësh apo të keqmenaxhosh parat që ke grumbulluar nga taksat e qytetarëve, është krimi më i madh që mund ti bëhet shoqërisë. Rasti më i fundit që doli në media, ishte gjatë kërkim shpëtimit pas tragjedisë së tërmetit të 26 nëntorit.

Për identifikimin e personave të gjallë nën rrënoja, duhej një qen, që mbërriti nga Kosova, i quajtur Sadak. Nga ana tjetër, Instituti i Përgatitjes së Qenve në Shqipëri, kishte shpenzuar plot 1.1 milionë dollarë, dhe nuk kishte asnjë qen për këtë emergjencë kombëtare.

Sadaku i Kosovës shpëtoi disa jetë njerëzish, ndërkohë që Policia e Shtetit disa ditë pas tragjedisë, publikoi një video në rrjetet sociale, ku tregonte Sadakun shqiptarë që kishte dhënë edhe ai ndihmë në operacionet e kërkim shpëtimit. Në fakt, në vendngjarje ishin me dhjetra gazetarë dhe kameramanë, por askush nuk e pa Sadakun e Policisë Shqiptare. Të gjithë panë Sadakun e Kosovës.

Në këto kushte, kur janë zhdukur edhe lekët e destinuara për trajtimin e qenëve, vetvetiu të lindin dyshimet se çfarë mund të jenë bërë me tenderat që organ izohen çdo ditë në vendin tonë.