Rama: Nuk ka listë të zezë

Edi Rama thotë se çdo ankesë nga qytetarët do të shqyrtohet nga një strukturë e posaçme, që do të jetë funksionale për pak kohë.

“Më vjen për të qeshur nga reagimet komplet të disproporcionuara të raportit të publikuar. Nuk ka listë të zezë të asnjëlloj forme. Është thjesht një raport. Kush e interpreton këtë se ne do vihemi në lëvizje për të bërë presion, nuk ka kuptuar asnjë gjë. Nuk do të shfrytëzojmë asnjë ankesë të paargumentuar. Do të bëhet çdogjë në mënyrë ligjore dhe mekanizmi për këtë është duke u ndërtuar. Nuk është mekanizëm fletërrufeshë elektronike. Mekanizmi që ne do të ndërtojmë kjo platformë ku çdo njeri do të ketë akses në bashkëqeverisje, nuk do të jetë një faqje ku njerëzit shfryjnë. Do të jetë për t’u dhënë hapësirë njerëzve që kanë shqetësim me ata njerëz që kërkojnë ryshfete dhe që japin shërbime pa thënë as faleminderit, as mirupafshim”, deklaroi Kryeministri.
 
E gjithë kjo fushatë e qeverisë socialiste, sipas Ramës, përveç përfitimeve që do t’u sjellë qytetarëve, do t’i sjellë përfitime edhe shtetit, sidomos financiare, ndërsa paralajmëroi se të larguarit nga administrate publike do të ndalohen me ligj të rikthehen aty për një peridhë të caktuar.

“Do të bëjmë një shkurtim drastik burokracish që brenda mandatit të ardhshëm të mos i thuhet njeriut të zakonshëm ‘shko këtu, atje etj. Disa zyra janë të tepërta, disa inspektoriate janë të tepërta, ku shumë njerëz janë aty si rezulta i përfitimeve të tepsisë.  Kjo do të na bëjë të ulim kostot financiare. Kush do të largohet nga një shërbim publik nuk do të ketë më të drejtë 10 vjet të rikthehet në shtet. Kjo do të bëhet me ligj. Do të kemi shumë rezistencë dhe shumë reaksion”, deklaroi ai.
 
Edi Rama u rikthye të flasë edhe për vetingun, rezultatet e të cilit tha se do të fillojnë të krijojnë lëvizjet e para të kundërshtarëve të procesit.

“Vetingu shumë shpejt do të japë efektet e tij. Keni për të parë që do bashkohen më shumë se më herët, jo ca në çadër, ca jashtë çadrës, por me çadrën, por do të jetë bashkim më i madh sesa përpara. Kush ankohet për vjedhje të votës, për oligarki dhe për tjetërsimin e votës. Zot na ruaj!”, u shpreh Kryeministri.

Top Channel