Kryeministri i Kosovës, Albin Kurti, u ka bërë sot thirrje shqiptarëve të Preshevës, Bujanocit dhe Medvegjës që të marrin pjesë nesër në zgjedhjet për Këshillin Kombëtar Shqiptar.
37.759 shqiptarë të regjistruar në Listën e Posaçme Zgjedhore kanë të drejtë të votojnë për Këshillin Kombëtar Shqiptar.
Katër lista zgjedhore, me gjithsej 107 kandidatë, garojnë për 29 vende në këtë institucion përfaqësues.
“Nesër, ju ftoj të merrni pjesë në zgjedhje dhe ta ushtroni të drejtën tuaj demokratike të votës, lirshëm e sipas bindjes suaj. Për të drejta të barabarta dhe për të ardhmen në vendlindje”, ka shkruar Kurti në Facebook.
Kurti ka thënë se pas më shumë se një dekade me vetëm 15 anëtarë, Këshilli Kombëtar Shqiptar rikthehet në përbërjen prej 29 anëtarësh falë rezultateve të regjistrimit të popullsisë më 2022.
“Këshilli Kombëtar Shqiptar ka autorizime publike në arsim, kulturë, informim dhe përdorimin zyrtar të gjuhës e shkrimit shqip. Nga shkolla shqipe e tekstet mësimore, te institucionet kulturore, mediat në gjuhën shqipe dhe ruajtja e identitetit kombëtar. Pavarësisht pengesave nga institucionet e shtetit serb, pasivizimit të adresave, diskriminimit dhe nënpërfaqësimit institucional, shqiptarët vazhdojnë të këmbëngulin për të drejtat e tyre dhe për të ardhmen në vendlindje”, ka përkujtuar Kurti./ Kosovapress
Top Channel
