Michael Carrick pritet të vazhdojë detyrën si trajner i Manchester United në ndeshjen e Premier League kundër Bournemouth, që do të zhvillohet të dielën, pavarësisht humbjes së rëndë 4-1 ndaj Como në Ligën e Kampionëve.
Sipas burimeve brenda klubit, situata vijon normalisht, ndërsa Carrick pritet të dalë në konferencën për shtyp para ndeshjes të premten, në orën 13:30.
Manchester United vonoi njoftimin për orarin e konferencës, duke shtuar dyshimet mbi të ardhmen e trajnerit pas paraqitjes zhgënjyese në Itali të mërkurën në mbrëmje.
Skuadra angleze e pati të enjten ditë pushimi, në përputhje me praktikën e zakonshme pas ndeshjeve, dhe pritet të zhvillojë dy seanca stërvitore përpara sfidës së së dielës, e cila nis në orën 14:00.
Klubi u kthye në Mançester rreth mesnatës, pasi udhëtoi nga Milano, ku kishte qëndruar pas ndeshjes me Comon.
Humbja 4-1 ka shtuar presionin mbi Carrick, ndërsa Manchester United kishte gjithashtu tetë lojtarë jashtë fushës për shkak dëmtimesh ose sëmundjesh. Mes zhvillimeve pas ndeshjes, Bruno Fernandes kritikoi publikisht taktikat e trajnerit.
Megjithëse drejtuesit e klubit duket se po i japin Carrick një tjetër mundësi, raportimet bëjnë të ditur se Manchester United po shqyrton edhe alternativa për pankinën.
Ish-trajneri i Gjermanisë, Julian Nagelsmann, përmendet si një kandidat i mundshëm për zëvendësimin e tij. Në listën e emrave të përfolur është edhe trajneri i Brightonit, Fabian Hürzeler, ndonëse ai raportohet se është i kënaqur me situatën e tij aktuale.
Top Channel
