Milani ka udhëtuar drejt Anglisë për të zhvilluar ndeshjen ndaj Bournemouth të vlefshme për javën e tretë të Fazës së Ligës së Europa League.
Kuqezinjtë do të kërkojnë të shënojnë fitoren e dytë radhazi në këtë kompeticion dhe të tretën radhazi duke përfshirë edhe atë ndaj Atalantës për të vijuar me rezultatet pozitive. Dhe i pari që e kërkon këtë është Amorim.
‘Kur fiton ndjen se ke më shumë besim dhe shkon në stërvitje me humor më të mirë-tha Amorim-e ndjej që futbollistët kanë besim; jo vetëm për fitoret e fundit, por edhe për mënyrën sesi luajmë’.
Trajneri portugez arrin në kuotën e 100 ditëve në drejtimin e Milanit dhe ai nuk e fsheh kënaqësinë për këtë.
‘I jam shumë mirënjohës klubit, më pritën shumë mirë dhe u ndjeva pjesë e një familjeje që në fillim. Për momentin nuk dua të bëj bilanc, por të them vetëm faleminderit-shtoi Amorim që më pas u kthye te sfida me Bournemouth ku nuk do të jenë as Chukwueze dhe as Gonçalo Ramos.
‘Si janë? Për Chukwueze nuk di të them, ka një problem ndryshe nga ai i Ramos, ndërsa për Ramos bëhet fjalë vetëm për kujdes paraprak. Nuk ka asgjë të rëndë, por ne jemi të përgatitur; të përqendrohemi te ata jo te ata që nuk janë-tha Amorim-do të përballemi me një skuadër që ka më shumë ritëm në krahasim me Salzburgun, do të ketë më shumë cilësi në duelet një për një. Kam luajtur këtu dhe e di që niveli do të jetë më i lartë në krahasim me ndeshjen e mëparshme. Do të jetë një ndeshje ndryshe, por jemi gati. Rose ka shtuar disa detaje të reja, por shoh të njëjtin ritëm dhe të njëjtin presing me futbollistë të rinj e të fortë që kanë ardhur nga merkato. Nuk është një ndeshje vendimtare, por do të jetë e rëndësishme për të kuptuar nivelin dhe momentin e skuadrës sonë’.
Top Channel
