Mehmeti lojtari me vlerën më të lartë në kombëtaren kuqezi, Broja pëson zhvlerësimin e rëndë prej 70%

Përditësimi i fundit i vlerave të futbollistëve në treg sjell ndryshime të rëndësishme për lojtarët shqiptarë. Anis Mehmeti vazhdon të kryesojë renditjen, por vlera e sulmuesit të Bristol City ka pësuar rënie prej 2 milionë eurosh krahasuar me qershorin e vitit 2026. Ndërkohë, Armando Broja është emri që regjistron zhvlerësimin më të madh në këtë përditësim.

Me një vlerë prej 13 milionë eurosh, Mehmeti mbetet në krye të futbollistëve shqiptarë, pavarësisht uljes nga 15 milionë euro që vlerësohej në qershor. Pas tij renditet Kristjan Asllani, me 12 milionë euro, ndërsa Ernest Muçi vlerësohet me 11 milionë euro. Në listën e lojtarëve me kuota dyshifrore është edhe Mirlind Daku, vlera e të cilit ka arritur në 10 milionë euro.

Në krahun tjetër, përditësimi ka sjellë zhvillime pozitive për disa futbollistë. Cristian Shpendi vlerësohet me 5 milionë euro, ndërsa Stavro Pilo ka arritur në 2.5 milionë euro. Klisman Cake kuotohet me 1.8 milionë euro, kurse talenti i ri Klevi Qefalija vlerësohet me 600 mijë euro.

Rënia më e fortë i përket Armando Brojës. Sulmuesi ka humbur 7 milionë euro nga vlera e tij, me një ulje prej 70%, duke zbritur në kuotën e 3 milionë eurove. Dëmtimet dhe mungesa e vazhdimësisë kanë ndikuar në ecurinë e tij, ndërsa shifrat e fundit pasqyrojnë një rënie të ndjeshme të vlerës së kartonit.

Një tjetër emër që ka pësuar ulje të konsiderueshme është Marash Kumbulla. Mbrojtësi ka humbur 2 milionë euro, me një rënie prej 40%, duke zbritur gjithashtu në 3 milionë euro.

Ulje të vlerës kanë regjistruar edhe Rey Manaj, Elseid Hysaj, Juljan Shehu dhe portieri Simon Simoni. Kështu, përditësimi i fundit paraqet dy tablo të ndryshme: Mehmeti ruan vendin e parë mes futbollistëve shqiptarë, por me një vlerë më të ulët se në qershor, ndërsa Broja pëson rënien më të fortë, duke humbur 7 milionë euro dhe duke zbritur në vetëm 3 milionë euro.

Top Channel