Chelsea është i hapur për shitjen e Malo Gustos, pasi gjatë merkatos së verës kërkoi 75 milionë paund për kartonin e mbrojtësit francez.
Sipas raportimeve të mediave të huaja, klubi londinez mund të rishikojë çmimin e lojtarit, ndërsa Paris Saint-Germain mbetet një nga klubet më të interesuara për shërbimet e tij.
Interesi i PSG-së për Guston ishte bërë publik që në muajin gusht. Kampionët e Francës po kërkojnë alternativa për të përforcuar krahun e djathtë të mbrojtjes, ku aktivizohet Achraf Hakimi, por edhe mundësi shtesë për repartin e mesfushës.
Përveç PSG-së, në garë për 23-vjeçarin kanë qenë edhe Atletico Madridi, Bayern Munich, Juventusi, Tottenhami dhe Manchester City. Ky i fundit shihej si një destinacion i mundshëm për shkak të lidhjes me ish-trajnerin e Chelsea-t, Enzo Maresca.
Gjatë verës, Chelsea kishte vendosur një çmim prej 75 milionë paundësh për mbrojtësin, afërsisht trefishi i shumës që pagoi për ta transferuar nga Lyoni në janar të vitit 2023.
Megjithatë, Gusto qëndroi në Londër dhe ka marrë minuta të rëndësishme në fillim të sezonit. Ai ishte titullar në tri nga katër ndeshjet e para të Chelsea-t në Premier League, por konkurrenca për një vend në formacion mund të rritet pas rikthimit të Marco Palestra-s, i cili iu bashkua klubit për 43 milionë paund dhe ka debutuar me fanellën e londinezëve.
Sipas raportimeve të Sky Sport, drejtuesit e Chelsea-t tashmë janë të gatshëm të shqyrtojnë ofertat dhe mund të rishikojnë vlerësimin financiar për lojtarin.
Nga ana tjetër, Gusto raportohet se është i kënaqur në Londrën Perëndimore dhe dëshiron të sigurojë një vend të qëndrueshëm në skuadër. Megjithatë, mungesa e garancive për rolin e tij në ekip thuhet se ka ndikuar në të ardhmen që ai mund të ketë te Chelsea.
PSG mbetet në pritje të zhvillimeve, ndërsa një ofertë e përshtatshme mund të hapë rrugën për negociata mes dy klubeve.
Top Channel
